வேல் கண்ணன்

நண்பர்களும் வருக

2012-02-09T21:54:00.000-08:00

நிதர்சன ஒளி

2012-01-24T21:21:00.000-08:00

உன் வாசல் நெளிக்
கோலங்களிலிருந்து வண்ணங்களாக
பட்டாம்பூச்சிகள் பறக்கின்றன
அவற்றிலிருந்து மீறியெழும் வாசனையொன்று
மகரந்தங்களை மலரவைக்கிறது

உன் கைகளில் உருளும்
தாயக்கட்டைகளிலிருந்து தொடர்ச்சியாக
தாயங்கள் விழுகின்றன
தாயங்களிலிருந்து மீறியெழும் புள்ளியொன்று
ஒளிச்சுழலை உறையவைக்கிறது

உன் கேசத்திலிருந்து உதிரும்
இழையொன்று இரவுகளாகக்
கவிழ்கின்றன
இரவுகளிலிருந்து மீறியெழும் கனவொன்று
நினைவுகளை நிலைக்க வைக்கிறது

உன் தூரிகையிலிருந்து வடியும்

ரகசியமொன்று கதைகளாக
உலவுகின்றன
கதைகளிலிருந்து மீறியெழும்

சொல்லொன்று

புதிரொன்றை விடுவிக்க வைக்கிறது

நன்றி : கல்கி

(22. 1. 2012 கல்கி இதழில் வெளியானது)

நன்றி : ஓவியர் A.Selvam

மிச்ச உயிர்

2011-10-08T00:18:00.000-07:00

நின்றிருப்பது நிராகரிக்கப்பட்ட நகரத்தின்
மறுக்கப்பட்ட பகுதி
அள்ளி பருகுவதற்கு தகதகவென அமிலக்கோடை நதி

முகவரியற்ற கற்றையான அணு உலைக்காற்று
வெட்ட வெளிதனில் Venomous நெளிகிறது

பாதி எரிக்கப்பட பிணங்களின் துர்வீச்சம்
இளைப்பாற விடுவதில்லை
முன் எப்போதோ உதிர்த்த வார்த்தைகள்
சிதறிக்கிடக்கின்றன அவரவர்களின்
வாசனையுடன்

அவற்றை நீர்த்துளிகளை விடவும் குறைவாகவே

பயன்படுத்திக் கொள்கிறேன்
இரவானால் மாய்ந்து போன நட்சத்திரங்களின் ஆவிகள்
எனது போர்வைக்குள் ஒளிந்து கொள்ள முயல்கின்றன
சிக்கு விழுந்த நூல்கண்டு சட்டென்று தன்னை
விடுவித்துக்கொண்டு
சாட்டையென மாறி சுளீர் விளாசலில் திசையெங்கும்
துரத்துகிறது
பெருந்தழலில் பற்களை இறுக கடித்துக்கொண்டே

உன் கன்னக்குழி மச்சத்தை

நினைக்கையில்

தொடர்ந்த கருஞ்சுருள் ஓடி ஒளிந்து கொள்கிறது.

நன்றி : கொம்பு
நன்றி : கவிஞர் வெய்யில்

அமிழ மறுக்கும் பந்துகள்

2011-08-11T01:42:00.000-07:00

நீ
என் மீது எறியும் எறிபந்துகள்

என் முகத்தையே தாக்குகின்றன
பால்யம்
தாண்டியும் தெறிக்கும் வலி

கன்றிப் போயிருப்பதை
வடுக்களுடன் நினைத்துக் கொள்கிறேன்.
பதிலுக்கு நான் எறியும் எறிபந்துகள்

உன்னில் எதையும் குறிவைப்பதுமில்லை
தாக்குவதுமில்லை
இலக்கின்றி எறியப்படும் என் பந்துகள்
உன் பால்யத்திற்குள் தொலைந்து போகாமல்
சுழன்று கொண்டேயிருக்கும்
இறகின் லாகவத்துடன்
நீ
திரும்பிப் பார்க்க நேரிடும்
பின்னொரு பருவதில்

உன் பால்யமே வீழ்த்திவிடும்
என்
அமிழ மறுக்கும் பந்துகள்

நன்றி : கல்கி

ஆதியும் அந்தமும்

2011-07-09T00:30:00.000-07:00

அடர் வனமொன்றில்

புதைந்திருக்கும்

உன் மெளனத்தின்

சொற்களுடன் எழுகிறது

ஒரு பறவை ஒரு மிருகம்

பெருமழையொன்றில்

குளிர்ந்திருக்கும்

உன் பார்வையின்

ஆழங்களுடன் விழுகிறது

ஒரு ஆலங்கட்டி ஒரு பாறை

மென்கொலுசொலியில்

ஒளிர்ந்திருக்கும்

உன் புன்னகையின் நெளிவுகளுடன் சுரக்கிறது

ஒரு துளி பால் ஒரு துளி விஷம்

மீளா துயரத்தில்

மீட்டியவாறேயிருக்கும்

உன் சுவாசத்தின்

ராகங்களுடன் துளிர்க்கிறது

ஒரு வாழ்வு ஒரு மரணம்

நன்றி : ஆனந்த விகடன்

மே வானவில்

2011-06-06T07:00:00.000-07:00

முற்றத்தில் கேட்பாரற்று கிடந்த
வானவில்லை வீட்டினுள்
பதித்தேன்

இருந்தவர்களும் வந்தவர்களும்
வீட்டிற்கு பலனில்லை என்றார்கள்

வண்ணங்கள் தேய்ந்தது

கோடையும் வந்தது

குழந்தைகளும் வந்தார்கள்;கைக்கொட்டினார்கள்

கரணம் அடித்தார்கள்; கிறுகிறு வானம் சுற்றினார்கள்

கண்ணாமூச்சி ஆடினார்கள்; புரண்டார்கள்
மூழ்கினார்கள்

கொள்ளாமல் பொங்கி வழிகிறது
வண்ணங்களில் ஒளி

செல்லும்போது
எடுத்தே சென்றார்கள்
அனைத்தையும்

(05.06.2011 கல்கி இதழில் வெளியான எனது கவிதை )

நன்றி : கல்கி

வேள்வி

2011-06-01T07:39:00.000-07:00

இயங்கு திரையில் தொலைகிறது இயற்பியல் தாவோ

மாயக்கம்பளம் கோணங்கியின் எழுது மையில் கரைகிறது

நீளும் மெளன மலையின் தவம்
அடைக்காப்பது நிலையாமையின்

நிர்மூலங்கள்

தன் எதிரில் நிற்கும் கிளி வழித்துணைக்கு அல்ல
தன்னில் பசியாறுவதற்கு மட்டுமேயென அறிந்திருக்கும்

இலவ மனம்.

சுற்றத்தாரை பொழியும் அமிலத்திலிருந்து
காப்பதற்கு கோபாலன் நம்பியிருப்பது

ஒற்றைப்பனை

பெருங்காதை இளவரசியை
மீட்பதற்கு மிஞ்சியிருப்பது

பொய்க்கால் குதிரை

உறைந்த சுவாசம்

புல்லாங்குழலுக்குள் இசைத்த வண்ணமிருக்கின்றன

அணையா கீதங்கள்
இறுதி சொற்களுக்குள்

தொடங்கிவிடும் கவிதையாய்

இறுதி நொடிக்குள் வாழ்ந்து விடலாமென்று

நாமும் பிறகும்

நன்றி : 361˚

தொடர்புக்கு :

361degreelittlemagazine@gmail.com

நன்றி : நரன்

நன்றி : நிலா ரசிகன்

நினைவோட்டம்

2011-05-25T00:36:00.000-07:00

கரையோரத்து மணலை
இருகைகளால் அள்ளி
மூடினேன்.
மூடிய கைகளுக்குள்
குறுகுறுத்து
ஓடிக்கொண்டிருக்கிறது
நதி

மே -2011 உயிர் எழுத்து இதழில் வெளியான எனது கவிதை
நன்றி : உயிர் எழுத்து

பிறிதொரு நாளில்

2011-05-20T22:27:00.000-07:00

தவிர்க்கப்படும்

உன் பார்வைகள் புறமுதுகில்

துரத்தி துவண்டுவிடுகிறது

நினைவில் வைத்துக்கொண்ட

சொற்கள் பயனற்று போகின்றன

நடந்தேறிய நிகழ்வுகள்

அனைத்தையும் எரிக்கிறது

என் வீட்டின் சுவர்கள்
இருள் படர தொடங்கியதும்
மிகுஅசதியை உணர்கிறேன்
சுருங்கி படுக்குமெனக்கு

எழுவதற்கு மனமில்லை
ஏன் ...யாருக்கு... எனப்படும்

கேள்விகளே

அதிகம் சுருங்கவைக்கிறது

துரோகத்தின் சாயம் கலையக்கூடும்
பிறிதொரு நாளில் மீண்டு வருகிறேன்
இவ்விலங்கிடமிருந்து

(நரனுக்கு....)

மே -2011 உயிர் எழுத்து இதழில் வெளியான எனது கவிதை
நன்றி : உயிர் எழுத்து

தற்காலிமாக

2011-05-14T02:26:00.000-07:00

நேற்றைய பொழுதில்
சந்தித்து கொண்டோம் எதிரெதிர் திசைகளில்.
புன்னைகைத்தோம் கைக்குலுக்கினோம்.
உன்பார்வை போல் என் பார்வையும்
வானம் தாண்டி கிடந்தது.
நம் முகத்தில்சுண்ணாம்பு கலவை
அப்பிக்கிடந்தது.

நம் சொற்கள் நலம் தாண்டி செல்லவேயில்லை
சில வேளைகளில் சொற்கள் நிறம் மாறுவதில்லை.
கண்முன்னே இனம் அழிவதயையும் கண்டுகொள்ளாத
நமக்கு
அந்த கணத்தில் சுற்றி நடப்பவைகளில்தான்
எவ்வளவு கவனம்.
விடை பெறுவதற்கான அவசரமும்
நெரிசலும் நமக்கு பக்கத்திலேயே கிடந்தன.

விடைபெற்றோம் அவரவருக்கான திசைகளில்.

வரும் நாட்களில் சந்திக்க நேருமானால்
என் முகத்தை பிட்டத்திலும்
உன் முகத்தை தோள்பட்டையிலும்
வைத்து கொள்வோம்
நமக்கிடையேயான

அந்தகணத்தில் நிகழும்

துரோக நடனத்தின்

அரங்கேற்றத்தை ஒத்திவைப்போம்
தற்காலிகமாவது.

மே -2011 உயிர் எழுத்து இதழில் வெளியான எனது கவிதை
நன்றி : உயிர் எழுத்து

இன்னும் செல்ல வேண்டும்

2011-05-07T00:27:00.000-07:00

இந்த ஐம்பது நிமிட பயணத்தில்
ஒருமுறை தான் கிடைத்தது
உன் பார்வை எனக்கு.

நான் சேகரித்திருக்கும்
பெருமழைநாளில் கிடைத்த
உன்னுடைய வெப்பம்
நாற்ற பிசுபிசுப்பில் குளுமை
பிணைத்து கொண்ட இளஞ்சூடு

களைத்து சாயும் போதெல்லாம்
வாஞ்சையுடன் வருடிக்கொடுத்த
விரல்களின் மெல்லிசை நடனம்

மின்சாரமற்ற இரவொன்றில்
கட்டுகடங்காமல் பொழிந்த முகவெண்ஒளி
(அன்றே சொன்ன போதும் நம்பவில்லை நீ)

மெத்தென குழைந்த முலைநிமிர்வு
ஈர்ப்பின் தாய்மை
ஆலமர ஊஞ்சலில் ஆடிய பருவங்களை
மீட்டுதந்த உன் படர்ந்த மடி

இதழ் மடிப்புகளில் ஒளிந்திருக்கும்
எனக்கு மட்டுமே தெரிந்த ரகசியங்கள்
ஆக அனைத்தையும் ஒப்படைத்து விடுகிறேன்

மீண்டும்
பார்வை கொடு

இன்னும் செல்ல வேண்டும்

மே -2011 உயிர் எழுத்து இதழில் வெளியான எனது கவிதை
நன்றி : உயிர் எழுத்து

ஒரு வரி கூட எழுதவில்லை

2011-02-28T21:12:00.000-08:00

ஒரு வரி கூட எழுதவில்லை
முதல் ஜாமம் கடந்து விட்டது
இரண்டாம் ஜாமம் கடந்து போகிறது
ஒரு வரி கூட எழுத முடியவில்லை

இள மஞ்சள் இளங்காற்று தொடரும் கண் அயர்ச்சி
பதற்றத்துடன் எழுதல் அல்லது எழுப்பபடுதல்

இயற்பியல் சித்தாந்தங்களின்
பக்கங்கள் வலுக்கட்டாயமாக
திருப்பப்படும் திணிக்கப்படும்

பற்றிக்கொண்ட வேகம்

வெப்பம் வெப்பக்காற்று
வெக்கை வெக்கை வெக்கை
தெறித்து விடும் கண்ணெரிச்சல்

நகுலன் ஒரு சமயம் எரிந்தது போல்
காண்பதெல்லாம்

என்கையில் ஒரு கத்தி எதிரே பல
தளர்ந்த நடை நரம்பு தளர்ந்த மஞ்சள்
இருப்பினும்
தளராத நெரிசல் அதிகரித்த கவுச்சி

பாதி வேக்காட்டை முழு வேகத்துடன் முழுங்கி
சாயும் போது ........'ஒரு வரி கூட எழுதவில்லை
இன்று எழுதி விட வேண்டும்
ஒரு வரியாவது'

நன்றி : வார்ப்பு

புரிதல் வியத்தல் வீழ்தல்

2011-02-01T03:30:00.000-08:00

I
என்னிலிருந்து
தெறித்தவை; பூத்திருக்கின்றன
உன் நீலநிறப் புடைவையில்
வெள்ளைப் பூக்களாய்.

II
ஒரு துளைக்குள் எப்படி
ஓராயிரம் வண்ணத்துப்பூச்சிகளை சிறகடிக்கவும்
ஓராயிரம் புரவிகளை சிலிர்த்தெழவைக்கவும் முடிகிறது.

III
பசுந்தளிருதிர்வைத் தவிர்க்க
நினைக்கும் வேளையில்
கிரகங்கள் குளிர் உறைந்திறுகிய
சோக நாடகமொன்று நிறைவுறுகிறது.
திரை சீலை இறங்குவதற்கு முன்
அடுத்த ஆட்டம் தொடங்கிவிடுகிறது
திரை சீலை போன்றே
வலமும் இடமும் அசைகிறார்கள்
துயரத்திலிருந்து மீள முடியாத பார்வையாளர்கள்
அரங்கத்தின் வெளியே காத்திருப்பவர்களையும்
மீளாத்துயரம் சூழ்வதை மவுனம் சொல்கிறது.
பசுந்தளிர் நோக்கி விரைந்து வந்து கொண்டிருக்கிறது
ஒரு எரி நட்சத்திரம்.

நன்றி : அதீதம்

பாதரசம்

2011-01-25T03:55:00.000-08:00

மென்மாலையில்
என்னுள் நிரம்பி ததும்பும் அமிலம்
உன் நிழற் படத்தின் மல்லிகை வாசத்தில்
கொதிக்க ஆரம்பிக்கிறது

அறையெங்கும் அலைந்த வெள்ளைப்பூனை
மடியேறி அமர்ந்து கொண்டது.
இப்பொழுது வாள் வீச்சின் சப்தம்

நன்றாக கேட்க ஆரம்பிக்கிறது

அவ்வப்போது அனக்கத்தை தனித்த

பக்கத்துவீட்டு தோழியும்

மாற்றலாகி சென்று

இன்றுடன் ஒரு மாத காலமாயிற்று

தாவியோட முயற்சித்த பூனையை

இறுக்கிக்கொண்டேன்

இப்பொழுது வாள்வீச்சு

மிக அருகாமையில்....

சுய மீட்டலில் தீப்பொறியை

பரிமாற்றியது உள் நரம்புகள்

சூடு தாங்காமல் வெள்ளைப்பூனை

தாகம் தணிக்க தொடங்கியது

ருசியறியாது

இப்பொழுது வாள்வீச்சு

என் உடலெங்கும்

நான் மறுபடியும் மறுபடியும் வீழ்கிறேன்

நன்றி : அகநாழிகை இதழ் 6

எனது போர்க்களம்

2011-01-18T22:30:00.000-08:00

கதைசொல்லி சொன்ன கதைகளின் வழியே

ஏழு மலை

ஏழு கடல்

அடர் காடுகள் கடந்து

சிகரத்தின் உச்சியில் பிடறி சிலிர்த்தெழுந்த

வெள்ளை புரவியில் அமர்ந்திருந்தேன்.

ராஜகீரிடம் கனத்தது.

பரந்த நிலப்பரப்பை தாண்டி

எதிரியின் மூவர்ணக்கொடி
உயர பறப்பதை காணமுடிகிறது
இங்கிருந்து

கடிவாளம் தளர்த்தி முன்னேறும் போது
எதிரியின் கொடி

தளர்வதையும் முன்னோக்கி

வருவதையும் காண்கிறேன்

எனதான படையுடன்

களம் அடைந்தேன்

இளைப்பாறிய புழுதியின் பின்

பெரும்திரளான படையுடன் எதிர்களத்தில்
நிற்கும் எதிராளிகளை உற்று நோக்குகிறேன்.

நூலிழையும் மாறுபாடுகளின்றி நானே அங்கும்

என்னிலிருந்து வீசும் ஆயுதங்கள்

என்னையே கொன்று குவிக்கின்றன
எல்லா தேசத்திலும்.

~~~~~~~~~~~~~~~~~~~~~~~~~~

நன்றி : சென்னை சங்கமம் 2011

நன்றி : உமா சக்தி

நன்றி : பொன். வாசுதேவன்

மற்றும் அனைத்து நண்பர்களுக்கும்

உன்னிடம் சொல்லிவிட வேண்டும்

2011-01-11T22:04:00.000-08:00

சிலுவைகளின்
மீதான அச்சங்கள் நடுநிசி
விழிப்புகளை தந்துவிடுகிறது.

நேற்றிரவு வெளியே மழை
இருளை கரைக்க முயன்றது.
மழையும் மழை சார்ந்த காற்றும்
எனது சிலுவைகளை பறக்க
செய்வதாகயிருந்தது.

தடையின்றி சுவாசிக்க முடிந்தது.
சிலுவைகள் பறந்தது ஆறுதலாகயிருந்த
மறுநொடியே இருளிலிருந்து சிலுவைகள்
வெளியேறியது.

இந்த சிலுவைகளை முதலில் கண்டது
கலைமணி மாமாவின் இறப்பின் போதுதான்.
அரசு மருத்துவமனையின் வளாகத்தில்
மூப்படைந்த மரத்தின் கீழ் நின்றிருந்தேன் அப்போது.
கதவை திறந்து வெளியேறிய அக்கா
'ஐயோ ..... ' வென
வீறிட்டபோது பெரும் பாறையாக இருள்
உருண்டோடி வந்து அமுக்கியது.
அந்நேரத்தில் தான் சிலுவைகள் என்னுடன்
அப்பியிருக்க வேண்டும்.

நிதானித்த போது
நின்றிருந்த மரத்தில் சிலுவைகள்
காய்த்து தொங்கியது.

உருண்டோடிவிட்டிருந்த ஆண்டுகளில்
சிலுவைகளும் உடன் வந்தன.
தற்போது சிலுவைகளின் பளுவும் அதிகரிக்க
புதிதாக துருத்திகொண்டுயிருக்கும்
துருவேறிய ஆணிகள் வேறு.

சருகுகள்
நிரம்பிய இந்த சாலையை கடப்பதற்குள்
உன்னிடம் சொல்லிவிட வேண்டும்
சிலுவைகளை பற்றி.
உனது மிதமான பார்வை
சிலுவைகள் உடைந்து நொறுங்குவதற்கும்
ஒரு தொடுகை
சிறகுகள் முளைப்பதற்கும்
போதுமானதாகயிருக்கும்

நன்றி : உயிரோசை

தினசரி

2010-12-30T20:36:00.000-08:00

பாலத்தின்
கீழ்
ஓடும் கருஞ்சாக்கடையின்
முனையிலிருந்து மேலெழுந்து
நி
ற்
கி
ற
து
எனது நகரம்

அழுகிய குப்பைகளின்
வீச்சத்துடன்
குழந்தைகள் விளையாடுகிறார்கள்
எனது தெருக்களில்

மாறுபாடுகள் ஏதுமற்று

சங்கொலியின் முடிவில்
இரைச்சலின்றி அணைந்து போகும்
இயந்திரங்களை போல் தனிமையும்.
தேய்ந்து போன
ஒரு போதும் தொலையாத
பகலை போன்ற காலணிகளை
அணிந்து கொள்கிறேன்.

அடுத்த
சங்கொலிக்குள் வாழ்வதற்கு
விரைந்து செல்கிறேன்
தினசரி.

நன்றி : உயிரோசை

நிழற்படம்

2010-12-20T06:09:00.000-08:00

எல்லா தடங்களையும்
சேகரித்துக்கொண்டு செல்கிறது
காலம்.

மவுனங்கள்
மீதேறி கடக்க நினைக்கும் ஒவ்வொரு முறையும்
சறுக்கி சாய்ந்து விழுகிறது என் கணைகள்.
மரத்தின் உச்சியை வெறித்துக்கொண்டே
உட்கார்ந்திருக்கும்
அந்த பெரியவரை/அவரை பார்த்துக்கொண்டுயிருக்கும் என்னை
மேலதிகமாக என்ன நினைத்துவிட முடியும்
'பைத்தியம்' என்பதை தவிர.

பின்மதிய வேளையின்
கடைவாய் எச்சில் ஒழுகும் உறக்கத்தை
திடுக்கிட்டு எழுப்பும் கனவுகளை
துரத்தியபடியே ஓடுகிறது பின்வரும் பொழுதுகள்.
மறக்க நினைத்த நிகழ்வுகளை
நினைவுப்படுத்தி செல்கிறது தூரத்திலிருந்து
கேட்கும் கனரக வாகனத்தின் உறுமல் சத்தம்.
கொஞ்சம் சிரிப்பும் நிறைய நிறைய வெளிச்சமுள்ள
அந்த நிழற்படம் இமை விட்டு விலகவேயில்லை
எழுதுவதற்கான வேகம்
தொடர்ந்து வரும் அடர் வெறுமை
தூக்கியெறிய சொல்கிறது
சீழ் பிடித்த நினைவுகள்
முதலானவைகளை.

(இசைபிரியாவிற்கு.... )

நன்றி : உயிரோசை

டிசம்பர் மாத கேணி சந்திப்பில் வண்ணதாசன்

2010-12-05T01:54:00.000-08:00

கேணி சந்திப்பு
டிசம்பர் 12 ஞாயிறு மாலை 4 மணி. பேசுபவர்: எழுத்தாளர் வண்ணதாசன்
இடம்: 39 அழகிரிசாமி சாலை கலைஞர் கருணாநிதி நகர்.
சென்னை 78.

அவரின் ஒரு கவிதை :

இந்த கவிதையை மிகச்சரியான சமயத்தில் கொடுத்து உதவிய கவிஞர் செல்வராஜ் ஜெகதிசனுக்கு நன்றி:

'பெய்தலும் ஓய்தலும்' சிறுகதை தொகுப்பு முன்னுரையிலிருந்து

ஒரு நசுக்கப்பட்ட புழு, ஒரு குதிரையின் புலம்பல், சாய்ந்த வனம், எரிக்கப்பட்ட நூலகம், புதைந்துபோன இசைக்கருவிகள், வன்புணரப்பட்ட யோனிகள், கலவரங்களில் வேட்டையாடப்பட்டவர், குளிர்பான பாட்டில்களுக்குள்
அடைக்கப்படுகிற நதிகள், நம்முடைய தோள் அளவுகள் இடுப்பு அளவுகள் அற்றுத்தைக்கப்படுகிற உடைகள், கடவுச் சீட்டுக்களுக்காகச் சுருக்கப்படுகிற பெயர்களில் தொலைந்து போகிற முன்னோர், காகிதத்தட்டுக்களில் பரிமாறப்படுகிற சக்கை உணவுகள், யாரோ முன் தீர்மானிக்கிற நமது அன்றாடத்தின் நிகழ்ச்சி நிரல்கள், சுவடற்று அழிக்கப்படுகிற பண்பாட்டு அடையாளங்கள், கழுகுகள் வட்டமிடத் துவங்கிவிட்ட கழுவேற்றப்பட்டு வெகு நாட்களான மொழி... இப்படியாகவே ஆன வழியில், தென்படுகிற கல் மண்டபங்களும் சில வற்றாத நதிகளும் தற்காலிக ஆசுவாசம் அளிக்கின்றன.

நதியும் மணலற்றுப் போய்க் கொண்டிருக்கிறது. இதுவரை அது தன் நீர்மையை மணலால் உச்சரித்துக் கொண்டுவந்தது. அள்ளப்பட்ட மணல், கலக்கிற சாயக் கழிவுகளில் மீன்கள் முச்சுத் திணறுகின்றன. நீந்துகிற மீன்களையல்ல, அதிகாலையில் இறந்து ஒதுங்கியிருக்கிற மீன்களைப் பற்றியே இந்த தினத்து கவிதை இருக்க முடியும்.

நன்றி : சந்தியா பதிப்பகம்.

இதனை பகிர்வதில் பெருமிதமும் மகிழ்வும் கொள்கிறேன்.

நன்றி ! நன்றி ! நன்றி !

காட்டில் நிர்வாணமில்லை

2010-11-15T21:36:00.000-08:00

மெல்லிய துணியிலிருந்து அடர்துணி வரை
மறைப்பதும் வளர்ப்பதும்
காட்டுத்தீயின் வெடிப்புகளையும் வீக்கங்களையும்
காட்டுத்தீயின் புண்கள் ஆறுவதேயில்லை
'பாற்கடலை நீந்திக்கடப்பது எளிது
பூவுடலுக்குக் கொடிது
எரியும் காடுகளைத் தாங்குவது '
என்றாள் யாழினி

எரியாத கனவில்
எழுதி வைத்திருந்தாள் யாழினி இவ்வாறாக;
என்மீது காடு வளர்ந்தது
வளர காரணமென்று அறிந்தேன்
மறைத்தலும் இருளுமென்று

நீரில்லாமல் காடு காய்த்தது
நீரில்லாமல் காடு கனிந்தது
நீரில்லாமல் காடு புளித்தது
நீரில்லாமல் காடு பழுத்தது
நீரில்லாமல் காடு உதிர்த்தது
நீரில்லாமல் காடு பூக்கவேயில்லை

மெல்லிய துணியில் உரசியது
அடர் துணியில் புகைந்தது
இருளில் ஜ்வாலையானது
எரியும் காடுகளைத் தாங்குவது
பூவுடலுக்குக் கொடிது
அழைக்க யாருமில்லை
அணைக்க விழியில்லை
அழிக்க மட்டும் வழியுண்டு: தீக்கு தீயே
எரித்து கொள்கிறேன் என்னையும் -

நிர்வாணங்களில் காடு வளர்வதில்லை
நிர்வாணங்களைக் காடு ஏற்பதில்லை
காட்டில் நிர்வாணமில்லை
பின் குறிப்பு :
யாழினி தன்னை எரிக்கும் போது வீட்டில் யாருமில்லை
குளியறையில் தன்னை எரித்துக் கொண்டாள்
உள்தாழ்ப்பாள் ஏதும் போடவில்லை
சப்தங்கள் எழுப்பவேயில்லை
கருகிய நாற்றம் அறிந்தே ஓடி வந்தார்கள்
மண்ணெண்ணெய் வீச்சத்துடன் நல்லெண்ணையும் வாசமும் அடித்தது
அரைவேக் காட்டில் மருத்துவமனையில் சேர்க்கப்பட்டாள்
பலப்பல தொடர்கேள்விகளுக்கு இறுதியாய் சொன்ன பதில்
தெளிவாகக் கேட்டாலும் யாருக்கும் புரியவில்லை
அவள் சொன்னது; 'காடு எரிகிறது இப்பொழுதும்'

நன்றி : உயிரோசை

நாளையும்

2010-10-12T02:56:00.000-07:00

மேல்பூச்சில்லாத சுவர்
சுவரின் நட்ட நடுவில் கடிகாரம்
கடிகார இரு முட்களைக் காணவில்லை
நொடிமுள் மட்டுமே
சுற்றிச் சுற்றி தேடும் இனியும்.

பசுஞ்சாணம் மெழுகிய வாசல்
வாசலில் வெள்ளைப் பூவொன்று கோலமாய்
கோலப்புள்ளிகள் மறையத்தொடங்கின
பின் வெள்ளைப்பூ அந்தரத்தில் மிதக்கும்.

சித்தூசி விழ இடமில்லாத தெருக்கள்
தெருக்கள் முழுக்க இலவச செருப்புகள்
ஒவ்வொரு செருப்பிலும்
மிதவை பலூன்கள்
கட்டப்படும் இலவசமாய்
அந்நாளொன்றில் தெருக்கள் வெறிச்சோடும்.

நாளையும்
மதி மறைத்த கதிரவன் உதிக்கும்.

நன்றி : உயிரோசை

இறுதி வாக்குமூலம்

2010-10-04T07:33:00.000-07:00

பிசிறாமல் இழையோடிய குழலின்
ஓசையொன்று என்னுள் விழுந்தது
இறகாய்.
முதலில் இதமாய் வருடிக்கொடுத்த
இறகு பிறகு பாளம்பாளமாய்ப்
பிளந்தது.
நாளங்களில் சுவாசம் அறுந்து
தொங்கியது. செல்கள் அனைத்துமே
சிதைவுற்றது.
பிறப்பின் வழியாக வந்த நான்
திரும்பிச் செல்கிறேன் இவ்வழியாக
இறுக்கம் ஏதுமற்று.

இதுவே
எனது இறுதி வாக்குமூலம்

(ஹரி பிரசாத் சௌராஸியாவிற்கு... )

நன்றி : உயிரோசை

மனிதனின் பிரமாண்டம் - ஒரு எதிர்க் குரல்

2010-09-30T21:45:00.000-07:00

பிரமாண்டம் - இவ்வொன்றை வைத்துக்கொண்டு மிரட்டோ மிரட்டு என்று மிரட்டுகிறார்கள். எத்தனை கோடியில் வேண்டுமானால் படம் எடுக்கட்டும். அவைகள் நல்ல படமா இல்லையா என்பதை காலம் தீர்மானிக்கும். ஆனால், அப்படியானவற்றை பார்ப்பது ஒரு தனி மனிதனின் கடமையாக மாற்றாதீர்கள்-மாற்ற நினைக்காதீர்கள். மாற்ற நினைப்பவர்களுக்கு எனது கடும் கண்டனத்தை தெரிவித்து கொள்கிறேன்

பிரமாண்டம் குறித்து பேராசிரியர் திரு. தொ.பரமசிவம் அவர்களின் கருத்தை இங்கே பதிவு செய்கிறேன்.

பிரமாண்டம் என்பது ஒரு அடையாளம். இயற்கையிலும் பிரமாண்டங்கள் உண்டு. அடையாறு ஆலமரம் இயற்கையில் பிரமாண்டமானது. மற்றவற்றின் இருப்பை நிராகரிக்கக்கூடிய பிரமாண்டம் இயற்கையில் கிடையாது. அந்தப் பிரமாண்டத்தில் நம்முடைய பிரமாண்டத்தைவிடப் பயன்தரக்கூடிய நூறு விஷயங்கள் உண்டு. ஆலமரத்தின் அடியில் இருக்கும் அதன் வேர்களுக்குகிடையில் பாம்புகள் வசிக்கும். அதன் மேற்பகுதி ஆயிரம் பறவைகளின் வாழ்விடம். ஆனால், ஒரு அரண்மனை அப்படியல்ல, மனிதன் ஆக்கிய பிரமாண்டம் என்பது அதிகாரம் சார்ந்த விஷயம். அதிகாரம் என்பது பிரமாண்டங்களை உருவாக்குகிறது. இந்த பிரமாண்டங்கள் எல்லாம் அடுத்த உயிரின் இருப்பையும் வாழ்வையும் கேள்விக்கு உள்ளாக்குகின்றன.

மேலும் வாசிக்க ...சமயம் , தொ. பரமசிவன் - சுந்தர்காளி வெளியீடு : தென்திசை பதிப்பகம்

நன்றி : தென்திசை பதிப்பகம்

காலச்சுவடுகள் *

2010-09-26T22:14:00.000-07:00

வார்ப்பு குழுமத்தின் படமும் வரிகளும்

ஆதாரமின்றி சுழலும் சக்கரத்தில்
மேலும் கீழுமாய் உருளும் நாகரிகம்
மேடு பள்ளங்களை உருவாக்கி -
சீரமைப்பு நடப்பதாக அறிவித்து -
கொண்டேயிருக்கும் அதிகார ஆளுமைகள்

நிற வேறுபாடின்றி எரிக்கும் நெருப்பு
பிணவாடையில் கரையும் பேரன்பு
ரத்த ஆற்றில் மூழ்கும் மனிதநேயம்
கழிவுகளை உறிஞ்சி கொள்ளும் நிலம்
மேலும் வலியது வெல்லுமென சமாதானங்கள்

இப்படியாக பதிந்த சுவடுகளை காலம்
கடற்கரையில் சிறுமி கூழாங்கற்களை
சேகரிப்பது போல் சேகரிக்கும்
இரைச்சலின்றி.

* படமும் தலைப்பும் வார்ப்பு குழுமத்தை சார்ந்தது
நன்றி : வார்ப்பு

பெருநகர சாலையில்

2010-09-23T02:36:00.000-07:00

பெருநகர சாலையில்
கைக்கொத்து பூக்களுடன்
சாலையைக் கடக்க முயலும் சிறுமி.

பூக்கள்
கலவை வண்ணங்களில்
பூக்களாய் மட்டுமேயிருந்தன.
இதழோரப் புன்னகையில்
ஒன்றியிருந்தார்கள் பூக்களும் சிறுமியும்.

துளியும் சிதறாத கவனத்தில் சிறுமியும்
சிறுமி மீது நானும் ...

உங்களின்
வாகனத்தை சில நிமிடங்கள் நிறுத்திவிடுங்கள்
சப்தமின்றி.
வன்சப்தங்களில்
மென்இதழ்களும் சுருங்கிவிடும்.

நுகராத பூக்கள்
தெய்வ திருவடி தாயின் மடி
தம்பி பாப்பா பிஞ்சு விரல்கள்
அல்லது
கல்லறையைக் கூட சேரட்டும்.

உங்களின் அயராத வேட்டையில்
உங்களின் அடங்காத வேட்கையில்
உங்களின் அவசர வாழ்வில்
பூச்சிறுமியை உதிர்த்துவிடாதீர்கள்
தயவு செய்து ....

நன்றி : உயிரோசை

ஒரு விண்ணப்பம்

2010-09-19T23:52:00.000-07:00

தெய்வமொன்று நேரில் வந்து
'வரமொன்று தருகிறேன்' என்றது.
நம்புங்கள், தமிழில் தான் பேசியது.
வியப்பான வினாவுடன் பார்த்தேன்.

"புரிகிறது, இருப்பதே என்னிடம் ஒன்று தான்
ஒன்றுக்கு மேல் கேட்டு விட்டால்?"
சரிதான். கொடுத்தே நொந்து போயிருக்கும் போல.

"வரம் பலிக்க வேண்டுமென்றால்
எனக்கொன்று செய்யவேண்டும் ..."
அது தானே பார்த்தேன்....

"நான் நான்கு கோப்பையை தருகிறேன்
ஒன்றில் தூயபாலை நிரப்பவேண்டும்"
நிரப்பினேன்.

"அடுத்ததில் தூயமது....."
இடைமறித்தேன்; நிரப்பினேன்.

உற்று என்னை கவனித்தபடி
"மூன்றாவதில் மனித ரத்தம்..."
நொடியில் நிரப்பினேன்.

"நான் மனித ரத்தம் கேட்பது
உனக்கு அதிர்ச்சியை தரவில்லையா ... ?"
'இல்லை. பழக்கப்பட்டுவிட்டது.
புத்தனின் பெயராலேயே இங்கு ரத்தம் குடிக்கப்பட்டது.
பிறகென்ன ...
நொடியில் நிரப்பிய காரணமும் அதுதான்'

தெய்வம் மெளனமானது.
நான்காம் கோப்பையை காட்டி
"தூய மழைநீர் ..." என்றபடியே மறைந்தது.
தூக்கி வாரிப்போட்டது எனக்கு.

பித்தேறி வெற்று கோப்பையுடன் அலைகிறேன்
உங்களிடம் இருந்தால் தாருங்கள் ...
தருபவர்களே வரத்தையும் எடுத்துக்கொள்ளலாம்
தருவீர்களா ... ?

நன்றி : வார்ப்பு

இறுதி செய்தி

2010-09-13T22:43:00.000-07:00

ஒளிந்து கொள்வதற்கு
எப்படித்தான் இவ்வளவு இடம் கிடைக்கிறதோ
இங்கே தானே இருந்தேன் என்கிறாய்.
எங்கே என்பது உனக்கு மட்டுமே தெரிந்த விந்தை.
போகட்டும்; இறுதியாய் சந்தித்துக் கொண்டபோது இனம்
அழித்தல் பற்றியும் அழிதல் பற்றியும் பேசிக்கொண்டோமே...
அது நடந்தேறி விட்டது என்று சொல்லிவிட்டுப் போகத்தான் வந்தேன்
நான் இனி திரும்பி வரப்போவதே இல்லை
இனி நீ ஒளியவேண்டிய அவசியமும் இல்லை

நன்றி : உயிரோசை

பேரழிவும் பேரண்டமும்

2010-09-08T04:53:00.000-07:00

காரணங்கள் ஆயிரம் இருக்கட்டும்.

பேரழிவில் மூழ்கிவிடும் தருணத்திலும்

நீயோ நானோ நாமோ

பரிமாறும் முத்தம்

உன்னை எனக்குள் என்னை உனக்குள்

இடப்பெயர்ச்சி செய்யுமாயின் .....

.... யார் மறுப்பது

மற்றுமொரு பேரண்டமே

உருவாகக்கூடும் என்பதை.

காணவில்லை : நீயும் நானும்

2010-08-19T05:47:00.000-07:00

நம்மிடையே நிகழ்ந்த நிகழ்வொன்றில்
ஐந்து தலை நாகமொன்று
நிரம்பிக்கொண்டது இடை....வெளியை.

உன்னுடையது என்று நானும்
என்னுடையது என்று நீயும்
தனித்தனியே விலகிக்கொண்டோம்

நான் விட்டு சென்ற ஆளுமையையும்
நீ தெளித்து சென்ற அலட்சியத்தையும்
விழுங்கி செழித்தது
மாறிமாறி பழிச்சொன்ன சொற்கள்
உற்சாககபானமானது

ஒரு பின்மாலையில்
நகர பற்களிலிருந்து பிதுங்கி ஒரு சேர
வந்தபோது அறையில் நிரம்பி தளும்பிய
ஆலகால விஷத்தில் மூழ்கிபோனோம்.

சில நாட்களாகவே
நாமிருவரையும் காணவில்லை

நன்றி : வார்ப்பு

நாம் மழைக்காக காத்திருக்கிறோம்

2010-08-03T00:04:00.000-07:00

கண்முன்னே திரண்டெழுந்த
கருமேகமொன்று வெள்ளமென
கொட்டிதீர்த்தது
நிதானிக்கவியலா நொடியில்.
மிதந்தன மூழ்கின : மூழ்கின மிதந்தன
துன்பவியல் தழுவியது நாடகம்
இறுதி காட்சி முடிவற்ற வெறுமை
அடுத்த காட்சி பற்றிய அறிவிப்புகள்
உறுதியாகவில்லை
"நாம் மழைக்காக காத்திருக்கிறோம்"

நிர்வாணத்தை கவனித்தல்

2010-07-23T21:44:00.000-07:00

சன்னலற்ற உள்தாழிடப்பட்ட அறையின்
கண்ணாடி முன் நிர்வாணமாய் நின்றிருந்தேன்.
உற்று கவனிக்கும் யாரோ
அருவெறுப்பான அழுகும்
என் நிர்வாணத்தைப்பற்றி பேசவும் கூடும்
அவர்களின் நிர்வாணத்தை மறைத்தபடி.
கேட்பவர்கள் தன் நிர்வாணத்தை
விடவும் பெரிதாக்கி கொள்ளலாம்
அவரவர்களின் அறையினுள் நுழையும் வரை.
கவனிக்க:
அவ்வறையை உற்று நோக்குபவனாகவும் நானிருக்கலாம்

நன்றி : தடாகம்

மன வட்டம்

2010-07-19T22:10:00.000-07:00

முதலுக்கும் முடிவிற்கும்
ஊசலாடிக்கொண்டியிருக்கும்
சிதறிய எண்ணத்தின்
தவிப்புகளைக் ஆதாரமின்றி
சுழலவிடும் வட்டப்பந்து

உனது எனது என
பிரித்தறிய முடியாதவைகளை
யாராலும்
அடையாளம் காணமுடியவில்லை
விடுபடுதலின் விதிகளை
மனனம்
செய்தும் பலனில்லை

வனத்தின் ஏதேனும் ஒரு
முனையிலிருந்து ஊற்றெடுக்கும்
நீருற்று என்னை நோக்கி
....வரும்
...வருகிறது
எனவும் நினைத்துகொள்ளும் மனம்

நன்றி : உயிர் எழுத்து ஜூலை 2010, தடாகம்

ஆறுதல்

2010-07-12T21:45:00.000-07:00

அடங்காத பசி புணர்ச்சி
நிற்காத கண்ணீர் ரத்தம்
நிறையாத துளைகள் செவிமடல்கள்
குறையாத நோய் தாகம்
மீளாத காலம் இளமை

இன்னும்
உடுத்தாத உடை முகமூடி பல
உடுத்தியவை நினைவில் இல்லை
(சில கிழிந்தும் தொங்குகிறது )

வாசிக்காதது மாதிரியே
எழுதாதவைகளும் எண்ணற்றவை

பொழுதுகள் போதவில்லை தான்
நட்சத்திரங்களை எண்ணுவதற்கு
ஆறுதல் ஒரே ஒரு
நிலவு.

நன்றி : உயிரோசை

விடியல்

2010-07-09T03:26:00.000-07:00

நீங்கள் எழுதும் சொற்களிலிருந்து
நீங்கள் பேசும் பேச்சுகளிலிருந்து
நீங்கள் வரையும் ஓவியத்திலிருந்து
நீங்கள் செதுக்கும் சிற்பத்திலிருந்து
நீங்கள் இசைக்கும் இசையிலிருந்து
என்றில்லை
உங்களிடமிருந்து பெற்ற பேனாவிலிருந்து
எழுதப்படும்
வழிப்போக்கனின் சிறுகுறிப்புகளிலிருந்தும் கூட.
தயவுசெய்து
நீங்கள் செய்யவேண்டியதெல்லாம் ஒன்றுதான்
எந்தகாரணம் கொண்டும் மூடிகளை

உங்களுடன் நிலையிருத்தி கொள்ளாதீர்கள்

நன்றி : ஜூலை 2010, உயிர் எழுத்து

வெண் சிலுவை

2010-07-07T05:32:00.000-07:00

இவர் ஒரு சிறுகதையை எழுத வேண்டிய பகுதிகளை மட்டும் எழுதி,
எழுதாமல் வாசகர்கள் புரிந்து கொள்ள நிறைய இடங்களை உண்டாக்கித் தருகிறார்
பிரபஞ்சன்
இவரைப்போல விலகி இருந்து இந்து முஸ்லீம் பிரச்சனையை எழுதியவர்கள் யாரும்கிடையாது. இந்தப்புத்தகத்தை இலக்கிய வாசகன் எந்த அளவுக்கு படிக்க வேண்டுமோ அதைக்காட்டிலும் படைப்பாளிகள் படிக்க வேண்டிய படைப்பு.
ந. முருகேசபாண்டியன்

மேலே சொன்ன இவர் என்ற பெருமைக்குரியவர் : சாதத் ஹசன் மண்ட்டோ
இவரைப் பற்றி இன்னும் தெரிய மதுமிதாவின் இந்த பதிவு

தூய்மையை நேசித்தவன் உங்களுக்கு உதவும் என்று நம்புகிறேன்

சில மாதங்கள் முன்பு திரு. மாதவராஜ் அவர்களின் இந்த பதிவை

அதிரவைத்த ஒரு ஆவணப்படம்! பார்த்து மிகவும் அதிர்ந்து போனேன். அவ்வப்போது அதிரவைப்பது (உண்மையை சொல்லி) அவரின் பாணி என்று தொடர்ந்து வாசிப்பவருக்கு தெரியும். மேலும் பதிவை பார்த்த பின்பு மண்ட்டோவின் எழுத்துகள் நினைவுக்கு வந்தது. பதிவில் இருந்த ஆவணப்படம் எடுக்கபட்ட காலமும் மண்ட்டோ எழுதிய காலமும் களமும் வேறு வேறு. ஆனாலும் தொடர்பு இருப்பதை நினைத்து வருந்த தான் வேண்டியிருக்கிறது. மண்ட்டோவின் 'திற' என்ற கதையை தழுவி எழுதப்பட்டது தான் கனவின் மிச்சம்

இது ஷகினாவின் வலி. இதில் மறுக்கமுடியாத உண்மை இந்த வலி நாம் கண்முன்னே நடந்து கொண்டே தான் இருக்கிறது இன்னமும்.

வெண் சிலுவை என்பது ஒரு குறியீடு மட்டுமே : இதன் பொருளாக

தூய ஒளி அல்லது அடர் இருள்,

விடுதலை அல்லது வெறுமை ,

மனதெளிவு அல்லது மனபித்து

இதில் நீங்கள் எதையும் தேர்வு செய்து கொள்ளலாம் - கதையை படித்த பின்பு.

இனி க(வ)தையிலிருந்து சில :

......எவரோ தன்னுடைய குழந்தையை தேடிக்கொண்டிருந்தார், எவரோ தன்னுடைய தாயை , எவரோ தன்னுடைய மனைவியை , எவரோ தன்னுடைய மகளை .... முழுவதுமாக அசதியுற்ற சிராஜூதின் ஓர் ஓரமாய் உட்கார்ந்து கொண்டார்.

...........அவரின் சிந்தனை ஷாகினா தாயின் இறந்த உடலோடு நின்றது. குடல் தனியே கிடக்க அதன் அருகில் அவளின் உயிரற்ற உடல்.
அதற்கு மேல் அவரின் நினைவுகள் நகர மறுத்தது.

சிராஜூதினால் இதை மட்டுமே சொல்ல முடிந்தது: 'ஐயா ... ஐயா .... நான் அவளை பெற்றவள்'

......டாக்டர் ஸ்டிரெச்சரில் கிடந்த அந்த உடலைப்பார்த்து அதன் நாடித்துடிப்பைப் பரிசோதித்தார். பிறகு சிராஜூதினிடம் ஜன்னலைக் காண்பித்துச்சொன்னார். "திற". ஸ்டிரெச்சரில் இருந்த உடல் சில அசைவுகளைக் காட்டியது. செயலற்று கிடந்த அதன் கைகள், இடுப்பில்
கட்டியிருந்த நாடாவை அவிழ்த்தது. பிறகு ...........

____________________
* மண்ட்டோ: ஒப்பற்ற கலைஞன். இவரின் படைப்புகளை அவசியம் அனைவரும் படிக்கவேண்டும் என்பது என் விருப்பம்.
'திற' வை தழுவி குறும்படம் ஒன்று எடுக்கப்பட்டதாக அறிகிறேன்
(கிடைக்கும் இடம் தெரியவில்லை ) அதனின் டிரைலர் இங்கே

'திற'(open it)

கருத்து சொன்ன(கேட்ட) அனைத்து நண்பர்களுக்கும் மிகுந்த நன்றியும் அன்பும்

( மண்ட்டோ படைப்புகள் : தமிழில் : ராமாநுஜம் வெளியீடு : நிழல் , 31 / 48 இராணி அண்ணாநகர் , சென்னை, E-mail : nizhal_2001@yahoo.co.in) நன்றி : மாதவராஜ் , மதுமிதா , திண்ணை.காம், நிழல் பதிப்பகம்

கனவின் மிச்சம்

2010-06-21T21:52:00.000-07:00

முன்பே
ஒரு முறை
வந்திருந்ததன் மிச்சப்பகுதியாகியிருந்தது
கடைவாய்ப்பற்களிடையே
சிக்கியிருந்த மாமிசத்திலிருந்து
அழுகல் வீச்சம். அடர்இருளின்
மூலையிலிருந்து அலறல் பீறிடுகிறது
அடிவயிற்றின் வன்பிசைவை
தொட்டபோது இளஞ்சூடாய்
ஒட்டிக்கொண்டது தொப்புளின்
குருதிக் கசிவு; திடுக்கிட்டு
எழுந்தபோது நெற்றிப்பொட்டில்
இடறியது வெண்சிலுவை

நன்றி : உயிரோசை
ஜூலை 2010 , உயிர் எழுத்து

சுய தேடல்

2010-06-15T04:19:00.000-07:00

கருமை பீடித்த குகையில்
என் இரவுகள் கரைகின்றன
வாசல் தேடி.

சுவர்களை
பீறாண்டுவதற்கு வளர்த்த நகங்கள்
பிடுங்கி எறியப்பட்டன

எண்ணற்ற
ரீங்காரத்திலிருந்து விடுபட துடிக்கிறது
சரிகமபதநி

கனியாகும் வரை
காத்திருக்க வாயக்கவில்லை
பசியாற்றுவதற்கு

தொலைத்தவர்கள் தான் தேடவேண்டுமாம்
தொலைத்ததும் நானே
தொலைந்ததும் நானே
தொடர்ந்தும் தேடுகிறேன்
தொடர்ந்தும் தொலைகிறேன்

எழுதி தீராத
இந்த கவிதையிலும்.

நன்றி : உயிரோசை

தீராத இசை மீட்டலில்

2010-06-07T06:24:00.000-07:00

மெளனவெளியெங்கும்
கிளைபரப்பி தவழ்ந்து படர்கிறது
தீராத இசையின் மீட்டலொன்று...
பிரக்ஞையற்ற உருவமொன்று
தன்வரையில் சோம்பிக்கிடக்கிறது
உதிராத காலச்சருகினில் இடையே
நுழைந்து கொள்கிறது நிகழ்வின் கணங்கள்.
நாளைய தினம் வாசிக்கப்படும்
தீர்ப்புகளைப் பற்றி அச்சமற்றுப் போகிறது.

இளம் பருவமொன்றின் படிமங்களை
சரம்கோர்க்கத் தொடங்குகிறது மனது..

நன்றி : உயிரோசை
ஜூலை 2010 , உயிர் எழுத்து
~ ~ ~

வெளியேற்றம்

2010-05-24T21:40:00.000-07:00

கரையான்கள் தின்றழித்த அச்சாணியற்ற சக்கரம் உதிரத்தொடங்குகிறது
மீண்டெழ முடியாத வலைகளில் சுழன்றடிக்கிறது
மிச்சக்காற்று

தகர கீரிடங்கள் நாற்காலிகளை அடைத்துக் கொண்டன
பகலிலும் பார்க்க முடிந்தது ஆந்தையை
இங்கு ஆள்பவர்களையும் அதிகாரிகளையும்
தவிர்த்து மீதியுள்ளவர்கள் தலையில்லாதவர்கள்

வீசியெறிந்த மாமிசத்துண்டுகள்
மனிதனுடையதா ?
மனிதனுக்குடையதா ?

தொன்மங்களின் தெய்வக்கல் ஒன்று
எல்லையிலிருந்து நகர ஆரம்பித்தது

நன்றி : உயிரோசை
~ ~ ~

விடியாமல் போகட்டும்

2010-05-13T22:02:00.000-07:00

இரவின் வானில் யாழினி விளையாடிக்கொண்டிருக்கிறாள்
கருநீலத்தைக் குழைத்துப்பூசிக்கொள்கிறாள்
நேற்றைய மழையின் வாசம் வீசிக்கொண்டுதான் இருக்கிறது.
பறவைகளின் பாதைகளில் அவள் விளையாடவில்லை.
அவள் மிதக்க விட்ட காகித மேகங்களின்
நடுவே விளையாடின வண்ணத்து பூச்சிகளும்.
மென்ஒளி நிலவில்
பறித்த விண்மீன்களைப் பத்திரப்படுத்துகிறாள்
என் அறிமுக இடர்ப்பாடுகளைத் தவிர்த்துவிடுகிறேன்
பிரபஞ்சம் விடியாமல் போகட்டும்

நன்றி: உயிரோசை
~ ~ ~

கதை

2010-05-08T02:51:00.000-07:00

கதை
தேங்கிய நீரில்
காற்றின்
அதிர்வட்டம் சொல்கிறது
மழையின் கதை

(மீள்பதிவு)

நிலை
திக்கற்று தேம்பியலைந்தவனுக்கு
எதிர்ப்பட்டது நிலைக் கண்ணாடி
கண நேர பரிமாற்றத்துக்குப்
பின்
விலகி நடந்தவனிடம்
எதுவுமில்லை.

ஞாபகம்
நீ
விட்டுச் சென்ற
குடையில் மிச்சமிருக்கிறது
ஈரமும் வாசமும்

தாகம்
எஞ்சிய மெழுகுவர்த்தி.
வெறுமையைத் தணிக்கிறது
வழிந்தோடிய கரைசல்
வெம்மை

நன்றி : உயிரோசை

கொடூர விலங்கொன்றின் சாயை

2010-05-03T01:54:00.000-07:00

கொடூர விலங்கொன்றை வளர்த்து வருவதாக சொன்னார்கள்
கொடியது ஆயினும் சைவ உண்ணி தான்,
வற்றினாலும் புசிக்கது அசைவத்தை எனவும் சொன்னார்கள்

விரல் நீள மெமரி கார்டில பதிவு செய்தவன் கேட்டான்
வளர்ப்பது ஏன் ? வெளியேற்றப்படும் நாள் எது ?
வெள்ளை நிற சட்டை அணித்தவர் பதில் சொன்னார்:
சூழல் கனிந்து வரும் காரணம் அன்று தெரியும்

மறுநாளில் தலை முதல் வால் வரை செய்தியானது

உலக அரங்கில் ஆலோசித்தனர்
விண்வெளி கண்கள் இருப்பிடம் தேடிமொய்த்தன.
தீனி செலவு கணக்கிடப்பட்டது ரகசியமாக
உள்துறை ஆட்கள் வேவு பார்த்தார்கள்

சந்தையில் விலங்கின் கற்பனை ஓவியமும்
கட்டுடைத்த கதைகளும் விற்று தீர்த்தது.
கேலிச்சித்திரம் ஒன்று எழுதி எழுதி அழிக்கப்பட்டது.

பிறிதொரு நாளில்
பெருந்தலைவனின் தலைமறைவு குறித்தும்
நடிகைகளுடன் தொடர்பு குறித்தும் செய்தியானது.

ஆனாலும்
குழந்தைகள் விளையாடும் தோட்டத்திலும்
கனவிலும்
கொடிய விலங்கு ராட்சத பேருருவமாய்
உலவிவருகிறது இன்னமும்.

நன்றி : வார்ப்பு
~ ~ ~

துளியின் வலி

2010-04-27T00:11:00.000-07:00

சதுப்புகள் படுத்துறங்கும் நிலம்
படிமங்கள் உள்ளடக்கிய
நீண்ட மலைகளில் பறவைகளின் நிசப்தம்
ஓடும் நதியின் கீழ் அனைத்தும் மெளனிக்கின்றன
இளமஞ்சள் பூக்கும் கரை ஓரத்தில்
காத்திருக்கும் அவளின் ஒற்றைக்கண்ணீர் துளி
பிரளய வலி செய்கிறது

நன்றி : உயிரோசை
~ ~ ~

2010-04-14T05:57:00.000-07:00

தேங்கிய நீரில்
காற்றின்
அதிர்வட்டம் சொல்கிறது
மழையின் கதை

நன்றி : உயிரோசை
~ ~ ~

ஆத்மா நாம் நினைவாக ..

2010-04-08T10:05:00.000-07:00

நலம் விரும்பிகளே!

நானிருப்பது கரையான்புற்றுக்குள்
பாம்புகள் வருவதற்குள் வேறிடம் சென்றடைவேன்
பறவைகளின் கூடு
ஆமைகள் அடைகாக்கும் குழிகள்
தவறினால் விழி திறந்த நிலம்

ஊதாரிகளுக்கு உங்களின்
கதவுகளிலும் சன்னல்களிலும்
தெரியும் வானம் பற்றாது
முடிவிலிகளை தேடிக்களைத்த
கால்கள் இளைப்பாறுகின்றன அலைகளில்
வெடிப்பில் கசியும் இரத்தத்தில்
பசியாறுகின்றன மீன் குஞ்சுகள்
வெளுத்து பிளந்த உதடுகள்
ஈரக்காற்றில் சுவாசிக்கின்றன

சுமந்த புத்தகங்கள்
இறக்கைகள் அல்ல என்பதை நான் அறிவேன்
சிலுவைகள் அல்ல என்பதை நீங்கள் அறிக
படைப்பு அனுபவம் பார்வை உலகம் ;
எனக்கும்.

அவ்வப்போது
காறியுமிழ்ந்த எச்சிலை துடைத்துவிடுகிறேன்
மேல்விழுந்த கற்களை புதைத்துவிடுகிறேன்
வீச்சமும் வடுக்களும் இருக்கத்தான் செய்கின்றன

தளர்த்திய கச்சையின்
இடைத்துணியின் பின்னிருக்கும்
இளஉறுப்புகளினால் பெரிதான சலனமில்லை
தன்னை சூடேற்றி கொள்வதை தவிர
நேர்ப்பார்வையை தவிர்ப்பது நானல்ல.

நீளஅகலங்களை குறித்து
குழி வெட்டுதலுக்கோ
சிதையூட்டுவதற்கோ
சொல்லியனுப்ப வேண்டியதில்லை
சில நொடிகளில்
மரணிக்க நேரிடும் என்னை
இந்த நதியே இழுத்து செல்லும்
கரையொதுக்காமல்

(ஆத்மாநாமிற்க்கு.... )

நன்றி : வார்ப்பு

*************************

சென்றுன் எதிரியைத் தேடு
நீ வளர்த்த
பூனையின் மயிர்க்கால்களிலும்
தண்ணீர்பாம்பின் உடலிலும்
ஒட்டியிருக்கக் கூடும்.
வெவ்வேறு வெளிச்சத்தின் சாயலுக்கேற்ப
முகங்கள் மாறக்கூடும்
கூடுவிட்டுக் கூடுபாயவும் கூடும்.

நிதானித்த வேளை; தோல்சாய்ந்த வேளை
வெப்ப தகிப்பின்
பின்னிரவில் கண்விழித்த பொழுது
நண்பகல் மரணச்செய்தியின்
வெற்றுச் சுட்டில்.
இவ்வுலகின் இருண்ட
பகுதியுனுள்ளும்
சென்றுன் எதிரியைத் தேடு *
உன் நிழலிலும் கூட.

(*நன்றி : ஆத்மாநாமின் கவிதை வரி )

இது ஒரு மீள்பதிவு

நன்றி : உயிரோசை

*********************

ஆத்மா நாம் ::: எனக்குள் தணியாத தழல் ஏற்படுத்தியவர். எனது பார்வையை பெரிதும் மாற்றியதில் பெரும் பங்கு இவரின் படைப்புகளுக்கு உண்டு. இயற்பெயர் : மதுசூதன். பிறப்பு : 1951, 18 , ஜனவரி. மிக முக்கியமான - சிறந்த - அரிதான இலக்கியவாதி.

'ழ' வின் ஆசிரியர். கவிதை எழுதுபவர்களும் எழுத நினைப்பவர்களும் ஆத்மா நாமை தவறாமல் படிக்க வேண்டும் என்பது என் விருப்பம்.
மேலும் அறிய 'ஆத்மா நாம் படைப்புகள்' (வெளியீடு : காலச்சுவடு). இம்முன்னுரையில் குறிப்பட்டது போல் இவரின் கவிதையின் இதயம் ஒரு "நிச்சலன மெளனம்" தான்.

மிக நேர்த்தியாய் உடை அணியும் பழக்கம் உடையவர் என்று சொல்ல கேட்டு இருக்கிறேன். லுங்கி மற்றும் உள்ளாடைகளுடன்

இவரை பார்த்தவர்கள் மிக மிக குறைவு. அப்படியான படைப்பாளி 06.07.1984 அன்று பேன்ட் சர்ட்டை கழற்றி படிகளில் வைத்து விட்டு கிணற்றுக்குள் குதித்து தற்கொலைக்கு தள்ளிய இறுதி நாட்களின் மனச்சிதைவை நினைத்தால் மனம் பதறுகிறது.

இதன் பதிப்பாசிரியர் திரு. பிரம்மராஜன் அவர்களுக்கும் அவருக்கு உறுதுணையாக நின்ற அனைவருக்கும் நன்றி

இனி அவரின் கவிதையில் இரண்டு :

மறுபரிசீலனை

நான் எதனையுமே மறுபரிசீலனைக்கே விட்டுவிடுகிறேன்

நான் படித்த புத்தகங்கள் என்னைக் கேலி செய்கின்றன.

நீ பழைய மனிதன் தான் என்கிறது ஒரு புத்தகம்

புதிய மனிதன்தான் என்கிறது இன்னொரு புத்தகம்

நான் மனிதன்தானா என்று சோதித்துக்கொள்ளும்

நிர்ப்பந்தங்கள்

தொண்டையில் சிக்கிக்கொண்ட மீனின் முள்ளென

பச்சைப் புல்வெளியிடை சிக்கிக்கொண்ட கரும்பாம்பு

வெறுமனே சும்மா இருக்க முடியாத பேனா

சிதறிப்பறக்கும் பிணத்தின்னிக் கழுகுகள்

எங்கோ கேட்கும் கூக்குரல்

துணிக்கயிற்றில் தொங்கும் குரல்வளைகள்

தூங்குபவர்களையும் தூங்குவது போல் நடிப்பவர்களையும்

எழுப்பும் வார்த்தைக் கூட்டங்கள்

புறப்பட்டாகிவிட்டது கருப்புப் படை.

திருஷ்டி

பானைத்தலை சாய்த்து
புல் பிதுங்கும் கைகளோடு
சட்டைப் பொத்தான் வெடிக்க
தொப்பையில் புல் தெரிய தனியாய்
யாருன்னைத் தூக்கில் போட்டார்
சணற் கயிற்றால் கட்டிப் போட்டு
உன் காற்சட்டை தருவேன்

சென்றுன் எதிரியைத் தேடு

ஆத்மா நாம்

காகித கப்பல்

2010-04-02T23:56:00.000-07:00

மண்வாசம் வீசும் திசையில் விரைகிறேன்
வழியெங்கும் மழை
எதிர் வரும் காற்றிலும் இழுத்து செல்லும் நீரிலும்
பேரிரைச்சலும் பெரும் சேதத்தையும் ஏற்படுத்துகிறேன்.
நீ அனுப்பிய காகித கப்பல் கடந்து செல்கிறது
துளியும் சலனமில்லாமல்.

நன்றி : வார்ப்பு
* * *

சப்த ஓசை

2010-03-20T00:24:00.000-07:00

1.
சட்டென்று
கவிழ்ந்த இருளில்
மீண்டு எழுகிறது
மெளத்தின் ஓசை

2.
இரைச்சலால் நிரம்பி
நெரியும்
தனிமையின் இருத்தல்
தெறிக்கிறது
குதித்தோடும் சிறுமியின்
சிணுங்கிய
கொலுசொலியில்

3.
எரியும்
மரங்கள்
கேட்கிறது
வீணை
அழுமோசை

4.
இழவு வீட்டின் விடிகாலை
ஓலம்
பிற்பகலில் தேய்வது
வரை...
நினைவுக்கு வருகிறது
நகர
ஒண்டுக்குடித்தனத்தில்
நடுநிசியில் கேட்கும்
குழந்தையின் வீறிட்டலில்

5.
ஒரே ஒரு
துளிதான்
ஓயாது கடலோசை

6.
ஒரு ஆழ்கிணறு
ஒரு கரும்பாறை
ஒரு கூழாங்கல்
ஒரு பூக்காத செடி
சலனமில்லாத நீரோடை
மீளாத தனிமையில்
கேட்கிறது
பிரிவின் வலியோசை

7.
கர்ப்பகிரஹத்தில்
எதிரோலிக்கிறது
கருவறையற்றவளின்
விசும்பலோசை.

நன்றி : இனிது இனிது - இலக்கிய இதழ்

இனிது இனிது தொடர்ப்புக்கு : அ. கார்த்திகேயன்.
அலைபேசி : +91 9952722942
**************************************************

சரிகை வண்ணத்துப்பூச்சி

2010-03-15T23:29:00.000-07:00

நீ அணிந்திருந்த புடவையின்
சரிகையிலிருந்து உதிர்ந்த
வண்ணத்துப்பூச்சியின்
மகரந்தங்களை ஏற்கத் தயங்கிய
மலரை வாஞ்சையோடு
உன்விரல்கள் தொடுகையில்
பளீரிட்ட செடியை
எனது சன்னலின் அருகில்
வேர் மண்ணோடு
இடம் பெயர்த்தேன்

அறையெங்கும்
பரவின
ஒளியும் உனது வாசனையும்

பின் மலர்ந்த
வண்ணத்துப்பூச்சியெல்லாம்
உன்னை நோக்கியே
பயணிக்கின்றன

நன்றி : உயிரோசை

அவரைப் பற்றி

2010-02-21T23:45:00.000-08:00

சில
வாரங்களுக்கு முன்
அவர் வந்திருந்தார்
கனமான புத்தகத்துடன்

என்
அறையில் சிதறிக்கிடந்த
புத்தங்களில் மூன்றை
தேர்ந்தெடுத்தார்.

'படித்து விட்டீர்களா'
பதில் எதிர்பாராமல்
பேசவும் தொடங்கிவிட்டார்
கொண்டு வந்த
புத்தகத்தை பற்றி

'கண்டிப்பாக படித்துவிடுங்கள்'
விடைபெறும் போதும்

சில
நாட்கள் சென்றபின்
தேநீர் நிலையத்தில் சந்தித்தோம்
'படித்து விட்டீர்களா'
இப்பொழுதும்
பதில் எதிர்பார்க்கவில்லை
பேச தொடங்கிவிட்டார்
கொடுத்த புத்தகத்தை பற்றி

பிரிகையில்
'நாளை மறுநாள் வரேன், பேசுவோம்'
என்னவென்று
உங்களுக்கும் எனக்கும்
தெரிந்தது தானே

நன்றி : தமிழ்த்தோட்டம்

புலப்படா வெளிச்சம்

2010-02-15T02:33:00.000-08:00

முகமறியா மனிதர்கள்
பெயர் தெரியாத ஊர்
கேட்பாரற்று கிடக்கிறது
உடல்.

வாசனையின் உணர்வோ
உணர்வின் காட்சிகளோ
ஏதுமற்று இயங்கும்
சுவாசம்.

இடையிடையே
வந்து போகும் வெளிச்சங்களின்
நிறம் எதுவெனப் புலப்படவில்லை.

கேட்டதையும் கிடைத்ததையும்
இனமறியவில்லை.

மனம் சோம்பிகிடக்கிறது
அறிவிக்கப்பட்ட
தோல்வியுற்ற கணத்தில்
ஆற்று மணலில் கால் பதிய
நடக்கத் தோன்றினும்
பேரமைதிக்கான களத்தில்
போராட சொல்கிறது காலம்.

பிப்ரவரி மாத சிக்கி முக்கி இணைய இதழில் வெளியான கவிதை

நன்றி : சிக்கி முக்கி

காவேரி அக்கா

2010-02-07T21:34:00.000-08:00

யாரும் பார்க்கவில்லையென
எல்லோரும் பார்க்க
பக்கத்து வீட்டு
ஆறுமுகம் சாருடன்
கைகோர்த்து சுற்றிய
காவேரி அக்காவை
பார்த்து மகிழ்ந்தேன்.

அழுது அடம்பிடித்து
அடிவாங்கி விஷம்குடித்து
பிழைக்கவைத்து பயமுறுத்தி
பிடிக்காத மாமாவிற்கே
கட்டிவைத்த காவேரி அக்காவை
பார்த்து கலங்கினேன்.

தாலி ஏறிய நாளில்
கேலியும் கிண்டலும்
சிரித்தபடி இருந்த
காவேரி அக்காவை
பார்த்து வியந்தேன்.

பின் 'மாசமாகி' வந்து
பிள்ளையும் பெற்ற
காவேரி அக்காவை
பார்த்து யோசித்தேன்.

குழந்தைக்கு
பால்மறக்கடித்த சிலநாட்களில்
அதே ஆறுமுகத்துடன்
ஓடிப்போன
அதே காவேரி அக்காவை
பார்த்து
என்ன செய்ய ....?

மாசி 06, 2010 வார்ப்பு இணைய இதழில் வெளியான கவிதை.
நன்றி : வார்ப்பு

நன்றி : காவேரி அக்கா குடும்பத்தினருக்கு,

மச்ச பலன்

2010-01-14T10:28:00.000-08:00

மச்சத்தின் இருத்தலில்
சொல்லிவிட முடியும்
பெண்ணின் குணங்களை
என்றவனை
வாய்பிளந்து பார்த்தாள்
யோனி தைக்கப்பட்ட
ஆப்பிரிக்க பெண்ணொருத்தி.

11.01.10 உயிரோசை இணைய இதழில் வெளியான கவிதை
நன்றி : உயிரோசை

அனனவருக்கும் பொங்கல் வாழ்த்துகள்

2010-01-13T09:17:00.000-08:00

இவையனைத்தும்...

2010-01-10T22:14:00.000-08:00

நேற்றுவரை நிதர்சனமானவைகள்
பொய்த்து போகிறது
திசைகள் அற்ற
நட்ட நடு பாலைவனத்தில்
கம்பளி போர்வையில் கிடக்கிறேன்
உள்நாக்கின்
அமிலரசம் அழுகிய வீச்சமடிக்கிறது
அவசர அவசரமாக சேகரித்து கொண்ட
ஒன்றிரண்டு நீர் திவலைகளும்
காய்ந்து விட்டது
இருளின் துணையோடு கருநாகங்கள்
சூழ்ந்து கொள்கிறது
கதறிய கண்ணீரின் முடிவிலும்
ஆறுதலற்று அலைகிறது மனம்

இவையனைத்தும் மாறிப்போகிறது
கழுத்தை இறுக்கிய
பிஞ்சுகரங்களில்

(வேல்விழிக்கு..)

04.01.2010 உயிரோசை இணைய இதழில் வெளியான கவிதை

நன்றி : உயிரோசை

பார்வையாளன்

2010-01-05T04:17:00.000-08:00

அரங்கம் சென்றேன்
முதல் நபரும் முடிவான நபராகவும் நானிருந்தேன்
முதல் வரிசையில் நான்காவதாக அமர்ந்தேன்
எழுந்து
ஏழாம் வரிசை சென்றமர்ந்தேன்
இருக்கை சப்தமிட்டது
உடன் எழுந்து
பின்வரிசை சென்றமர்ந்தேன்
மேடையில்
காட்சிகள் தோன்றி மறைந்தன
எனது இருக்கை தான் நிலைத்தபாடில்லை.

நன்றி : வார்ப்பு

எதிர் வினை

2010-01-01T21:52:00.000-08:00

சுவரின்
பின்புறங்களில்
காத்துக்கிடக்கிறது
கதவிடுக்குகளின் வழியாக
உள்கசிய காத்திருக்கும்
எனக்கான வெளிச்சபுள்ளிகள்

விடாப்பிடியாக
பிடித்துக் கொண்டும்
குவளை குவளையாக
இருள் அமிலத்தை
ஊற்றி கொண்டிருக்கிறாய்

இன்னுமொரு
நாளில் சிந்தபோகும்
ஒரே ஒரு
பனித்துளியில்
கரைந்துபோகும்
உன் கடலளவு
காதல்.

29.12.2009 உயிரோசை இணைய இதழில் வெளியான கவிதை
நன்றி : உயிரோசை

(இது ஒரு மீள் பதிவு)

மரங்களடர்ந்த சாலையின் காலை

2009-12-29T21:40:00.000-08:00

மரங்களடர்ந்த சாலையின் காலை
என்னுடன்
பழகிய நடையில் முதியவர்
நடை பழகும் இன்னொருவர்.

இளைப்பாறுவதற்கு
அவரவரருக்கேன்று ஒரு மரம் பிடித்தோம்
நடை பழகியவருக்கு மூச்சிரைத்தது
நாட்களில் பழகிப்போனது.
பிறகு
இன்னும் சிலர் சேர்ந்து கொண்டார்கள்
பிறகு..
இன்னும் சிலர்... இன்னும் சிலர்...

அவரவருக்கென்று
மரங்கள் கிடைப்பதில்லை
சில நாட்களாக
முதியவரை காணவில்லை

மரங்கள்
பூச்சொறிவதற்கும் இலையுதிர்ப்பதற்கும்
மறக்கவில்லை.

தமிழ்த்தோட்டத்தில் வெளியான எனது கவிதை
நன்றி : தமிழ்த்தோட்டம்

மெளன புரிதல்

2009-12-16T06:17:00.000-08:00

உனக்கும் எனக்கும் பொதுவானவை
மெளனம்
இருப்பினும்
நீ
மெளனித்த வேளைகள்
என்னை கலவரப்படுத்துகிறது
நான்
மெளனித்த வேளைகள்
உன்னை சந்தேகிக்கவைக்கிறது

எண்ணற்ற வார்த்தைகள்
நிறைவு செய்வதாக
நம்பி கொண்டிருக்கிறோம் இருவருமே
வார்த்தைகள் சேர சேர
உன்னிலிருந்து நானும்
என்னிலிருந்து நீயும்
செல்கிறோம்
வெகுதூரத்துக்கு அப்பால்

கடக்கவியால தூரங்கள்
எதிர்பாரா திருப்பத்தில்
முடிவடைவதை போன்ற
மெளனத்தில் வாழ்கிறது
நமக்கானவை அனைத்தும்

14.12.2009 உயிரோசை இணைய இதழில் வெளியான கவிதை
நன்றி : உயிரோசை

நிறுத்தம்

2009-12-15T02:44:00.000-08:00

சவுக்கால்
தன்னையே அடித்து கொள்ளும்
இளைஞனின் கால் சலங்கையொலிக்கேற்ப
இடுப்பசைத்தபடியே
முதுகின் வழி பாதம் தொடும்
சிறுமி.

அதிர்ந்து பார்க்கும் என்னுடைய
வலது மணிக்கட்டை தொட்டு
'பசிக்குதுண்ணா'
என்றபடி கைநீட்டும் பெண்.

செல்லும் பேருந்து வந்து விட்டது.

என்னிடம் இருப்பது ஒன்றுதான்.
பயணத்தை தொடங்கவில்லை
இன்னும் நான்.

நன்றி: தமிழ்த்தோட்டம்

சுவாசம்

2009-12-11T22:43:00.000-08:00

மீன் விற்கும் ஒருத்தியும்
பெருங்காயம் விற்கும் ஒருத்தியும்
ஒரே வீட்டில் இருந்தார்கள்

இவர்கள்
கண்ணயர்ந்தவேளையில்
சுவரில் சாய்ந்திருக்கும்
கூடைகள்

நூகர்தலுக்கு
இடம் வலம் ஏது?
கலந்தேயிருந்தன
வாசனையும் வீச்சமும்

ஆத்திரமோ அவசரமோ
நாள் ஒன்றில் மாறிப்போன
கூடைகளிருந்து கூடுதலாகவே
விற்றும் தீர்த்தன

சமைத்தவர்கள் வீடுகளிலிருந்து
கலந்தே வெளியேறுகிறது
நாசிகள் தேர்ந்தெடுத்து
கொள்கின்றன தேவையானவற்றை

நன்றி : வார்ப்பு

நண்பர் கிருஷ்ண பிரபு அழைப்பு : தொடர் பதிவு

2009-12-09T22:55:00.000-08:00

நண்பர் கிருஷ்ண பிரபு அழைப்பு : தொடர் பதிவு

இந்தத் தொடர் பதிவுக்கான விதிகளாகக் கொடுக்கப்பட்டிருப்பவை

1. பிடித்தவர்களும், பிடிக்காதவர்களும் தமிழ்நாட்டிற்குள்ள இருக்கணும். (நீங்க எழுதறப்பவோ நாங்க அதைப் படிக்கறப்பவோ அவரு ஷீட்டிங்குக்கோ, மீட்டிங்குக்கோ வெளிநாடு போயிருக்கலாம்.. தப்பில்ல!)

2. நீங்க இதை எழுத அழைக்கிற பதிவர் குறைந்தது இருவராகவும், அதிகபட்சம் ஐவராகவும் இருக்கலாம்.

3. பிடித்தவரோ, பிடிக்காதவரோ கண்டிப்பாய் பிரபலமானவராய் இருக்க வேண்டும். அவங்களை உங்களுக்கு இப்பத்தான் பிடிக்கல, பின்னாடி பிடிக்கலாம்ங்கற சமயத்தில தற்போது-ன்னு சேர்த்திக்கலாம்.

4. கேள்விகள் குறைந்தது ஏழு இருக்கணும். ஆனா பத்தைத் தாண்ட வேண்டாம்.

இனி :
01.
பிடித்த தலைவர் :
தந்தை பெரியார், காமராஜ் , கக்கன்
பிடிக்காதவர்கள் :
ஜெயலலிதா, கருணாநிதி , ராமதாசு,விஜயகாந்த்.
மற்றும் காங்கிரசு தலைவர்களும்

02.
பிடித்த அதிகாரி :
இறையன்பு.
பிடிக்காத அதிகாரி :
அலுவகத்தில் குறட்டை விடுபவர்கள்

03.
பிடித்த நடிகர் :
M.R. ராதா, நாசர், ரகுவரன், பசுபதி.
பிடிக்காத நடிகர் :
'எனக்கு பின்னாடி தமிழ் நாடே இருக்கு' என்று வசனம் பேசுபவர்கள்.
'நான் சொன்ன அவங்க உயிரையும் கொடுப்பாங்க' (போங்கடா .',,,,,,,,,,,,,')

04.
பிடித்த நடிகை :
தேவிகா, ஷோபா
பிடிக்காத நடிகை :
குஷ்பு , சிம்ரன்.

05.
பிடித்த திரைப்பட பாடலாசிரியர் :
பட்டுகோட்டை கல்யாண சுந்தரம், கண்ணதாசன், அறிவுமதி
பிடிக்காத திரைப்பட பாடலாசிரியர் :
பேரரசு

06.
பிடித்த இயக்குனர்கள் :
மகேந்திரன், பாலு மகேந்திரா, சேரன்,பாலா
நம்பிக்கை தருபவர்கள் :
அமீர், சசி(பூ) , சசிக்குமார், மிஷ்கின், வசந்த பாலன்,பாண்டிராஜ்
பாலாஜி சக்திவேல் , சிம்புதேவன் மற்றும் இன்னும் பலர்.
பிடிக்காத இயக்குனர்கள் :
பாலசந்தர், விக்ரமன், பேரரசு

07
பிடித்த ஓவியர் :
ஆதிமூலம், மருது
பிடிக்காத ஓவியர் :
ஜெயராஜ்

08.
பிடித்த திரைப்பட பாடகர் :

ஆண் : P.B. ஸ்ரீநிவாஸ், ஜெயச்சந்திரன்,K.J. ஜேசுதாஸ்
பெண் : P. சுசிலா, சித்ரா, ஜென்சி, ஜானகி

பிடிக்காத திரைப்பட பாடகர் :

ஆண் : உதித் நாராயண்
பெண் : L.R. ஈஸ்வரி , அனுராதா ஸ்ரீராம்.

நான் அழைக்கும் பதிவர்கள் :

அன்புடன் நான் : சி. கருணாகரசு
மனவிழி : சத்ரியன்.

ஒப்பம்

2009-11-18T05:32:00.000-08:00

(வார்ப்பு இணைய இதழ் 16-11-2009 வெளியான எனது கவிதை)

கையொப்பம் கேட்டார்கள்
அவரவருக்கான காற்றில்
அவரவருக்கான வானத்தில்
பறப்பதற்கு.

நிரப்பபடாத ஒப்பந்த படிமத்தில்
கிழிந்து தொங்கியது வானம்
சுவாசிக்கவும் மிச்சமில்லாத
காற்று.

மறுக்கையில்
நிர்முலமாக்கபட்ட பிடரியில்
வெடித்தது துவக்கு.

ஒன்றன் பின் ஒன்றாக
கையொப்பம் இட்டு நிமிர்கையில்
உடைந்தது சூரியன்.

நன்றி : வார்ப்பு

கிண்ணத்தில்..

2009-11-13T05:37:00.000-08:00

(தமிழ்த்தோட்டம்  இணைய தளத்தில் வெளியான எனது கவிதை)

கிண்ணத்தில்
                       மசிய பிசையப்பட்ட
                       பால்சோற்று கரைசல்
                       நீள் வடிவ விளிம்புகளில்
                       தளும்புகிறது.

கிண்ணத்தில்
                      பசியாறுவதற்கு தவழும்
                      மழலையோன்றும்
                      காட்டு விலங்கொன்றும்
                      நெருங்கின்றன.

கிண்ணத்தில்

                    தற்செயலாகவோ
                    திட்டமிட்டோ
                    மழலை குதறிய விலங்கின்
                    பற்களிலிருந்து ஒழுகியது
                    உதிரம்.

கிண்ணத்திலிருந்து....
                   பெருக்கெடுத்தோடுகிறது
                   வெறியும் பசியும்.

நன்றி : தமிழ்த்தோட்டம்

என் காதல் கவிதையும் நீயும்..

2009-11-08T22:18:00.000-08:00

(வார்ப்பு இணைய இதழில் 'என் காதல் கவிதையும் நீயும்...' என்ற தலைப்பில்
வந்த எனது கவிதை. தலைப்பு வார்ப்பு குழுமத்தை சார்ந்தது.)

தினம் கவிதை கேட்கிறது
உன் இதழ்
உடனே தந்தும் விடுகின்றன
உன் கண்கள்
எழுதத்தான் மனமில்லை
வெற்று மைக்கொண்டு
உன் மென்மையை
கரைத்து தா !
சேமித்து கொள்கிறேன்
கவிதையின் வழியாக
உன்னை.

நன்றி : வார்ப்பு

சேதி

2009-11-06T22:23:00.000-08:00

(11.11.09 தேதியிட்ட ஆனந்த விகடனில் வந்த எனது குறுங்கவிதை)

கதை சொல்லி
பெரியப்பாவின்
சாவுச் செய்தி வந்தது
எஸ். எம். எஸ் -ல்

நன்றி : ஆனந்த விகடன்

அறையில்.....

2009-11-02T21:11:00.000-08:00

(02.11.2009 உயிரோசை இணைய இதழில் வெளியான எனது கவிதை)

பழுப்பெறிய சுவரில் தெளிக்கிறது
எனக்கான பொழுதுகள்
அதன் நிழலில் கரையத்
தொடங்குகிறது யாரும்
தீண்டாத என் ஓவியம்

சுவரின் பின்புற
தார்ச்சாலையின் கானல்நீரில்
நெளிகிறது என் நிழல்
இறுதிவரை வருவேன் என்றவனும்
நிழலுடன் தங்கிவிட்டான்

இந்த அறைக்குள்ளயே சரியத்
தொடங்கிவிட்டது வெயில்
பேசியே சலித்துவிட்டது சிலந்தி
பிசுபிசுப்பாய் கசிந்தது
புழுக்கத்தின் வீச்சம்

இனி
மெல்ல விழுங்கும் தனிமையின் காமம்

நன்றி : உயிரோசை

முள்வேலிகளுக்கு அப்பால்

2009-10-23T03:55:00.000-07:00

( 20.10.2009 உயிரோசை இணைய இதழில் வெளியான கவிதை )

இங்கிருந்து வரையறுக்கப்பட்ட

முள்வேலிகளுக்கு அப்பால்

மழையுறும் பெரும் திடல்

மின்னலின் வெளிச்சத்தில்

தனக்கான இருப்பை

உறுதி செய்யும்

துணி கூடாரம்

மிச்ச உயிரையும்

மாய்த்துகொள்ளக் காத்திருக்கிறது

ஊழிக்காற்றில்

இடியோசையில் அதிர்ந்து

வீறிடும் குழந்தையின்

அழுகுரல் கேட்டு

நகரும் பாம்பு

சட சட வென

முறியும் ஒலி

தூரத்தில் கேட்கிறது

செய்வதறியாது நிற்கின்றேன்

வேலிகளுக்கு இப்பால்

(நன்றி : உயிரோசை )

பிரதான சாலையின் இரு நிகழ்வுகளும் பெருமழையும்

2009-10-18T22:53:00.000-07:00

(அகநாழிகை அக்டோபர் 2009 இதழில் வெளியான கவிதை)
1.
கால் பரப்பி
குப்புற கிடந்தவனை
வெள்ளை துணியால்
போர்த்தினார்கள்
அவனிடமிருந்து
அலைபேசியின்
அம்ருதவர்ஷினியை
மழை கரைத்தது
சிறு கூட்டமும் தெறித்தது.
2.
மண் சிதை பொம்மையை
செய்தவனும்
விற்பவனும் ஆகியவன்
பெருகி வந்த
வட்டியையும் மழையையும்
எண்ணி சிதைந்தான்.
உள்வைத்த
பொம்மைகளுக்குள்
ஒடுங்கினான்
3.
அவன்பாடு போய் சேர்ந்தான்
இவன்பாடு நிற்கின்றான்
மழை வலுத்தது.

நன்றி : அகநாழிகை

பறத்தல்

2009-10-13T03:06:00.000-07:00

(அகநாழிகை அக்டோபர் 2009 இதழில் வெளியான கவிதை)

சட்டையின் முன்
வரையபட்டிருந்த
மரமொன்றிலிருந்து பறவைகள்
ஒவ்வொன்றாய்
பின் விரிந்திருந்த
கிளையில் அமர்ந்தன

கிளை
பறவைகளானது

எங்கும் நிரம்பியிருந்தது
சப்தங்களால்
வேறு ஒரு நாளில்
பறவையற்ற மரம்
சாய்ந்த பொழுதிலிருந்து
நிசப்தமானது

பரந்த கிளை
மட்டும்
வெறுமையாய்.

நன்றி: அகநாழிகை

இருந்து விட்டு போகட்டும்

2009-10-05T01:05:00.000-07:00

உனது நண்பர்கள் ஆறுபேரை
அழைத்து வந்தாய்
அறிமுகமும் செய்தாய்
அவரவர் பெயர் ஊர்
புனைபெயர்
மற்றும்
நீண்ட நட்பு
நெடுநாள் நட்பு
நெருங்கிய நட்பு
பால்ய நட்பு
பிரித்தும் சொன்னாய்
'என்ன செய்கிறார்கள்'
"கவிதை செய்கிறார்கள்"
..ஆக மொத்தம் உன்னுடன்
சேர்ந்து ஏழு

வேல் கண்ணன் கவிதைகள்

2009-09-30T22:18:00.000-07:00

1.
தீரவில்லை தான்
அழவைப்பதற்கும்
அணைப்பதற்கும்
கொஞ்சம்
கவிதையும்
மழையும்

2.
கடந்து செல்கிறேன்
நீ கூட வருவதாய்
நினைத்து கொண்டு

3.
தண்ணீரில்

அடித்து சென்றது
கழிவுகளும்
கனவுகளும்

4.
ஆழி சூல் உலகு
பூமி கூட
சொந்த 'காலில்'

5.
கவிதை
குடி கொண்டது
கவிஞனைக்
'குடி' கொன்றது

6.
நிலைத்த மெளனம்
கலைந்த சிரிப்புமுமாய்
இருக்க வாய்த்திருக்கிறது
மரங்களுக்கு

7.
தன்னை தேடுபவர்களை
தெரிந்தே தான் விடுகிறது
விலைமாதுகளுக்கு
கடவுளுக்கு மட்டும்....

8.
கரையிலிருந்து நடந்தேன்
மிச்சமாய் ஒட்டியிருந்தது
மணற்துகளும் நதியும்

9.
பெரும் சன திடலில்
உன் சுட்டு விரல்
கூட தராத
நயவஞ்சகி நீ !

10.
வெற்றுதாளில் கிறுக்கியது
குழந்தை
மோட்சமடைந்தது மரம்

தோழர் சி.கருணாகரசு மற்றும் தோழி ஹேமா அவர்களின் அன்பான அழைப்பிற்கு....

2009-09-18T22:00:00.000-07:00

அ - அகிலமெங்கும் அன்பு

ஆ - ஆணவம் தவிர்ப்போம்

இ - இல்லாமை இல்லாத நிலை வேண்டும்

ஈ - ஈழம்(தனி) தமிழனுக்கே

உ - உழவன் உலகில் உன்னதமானவன்

ஊ - ஊறு விளைவிக்காமை

எ - எண்ணத்தெளிவு

ஏ - ஏன் என்ற கேள்வி

ஐ - ஐந்தருவி

ஒ - ஒவ்வொரு மணித்துளியும்..

ஓ - ஓட்டு என்பதன் மீது குறைந்து வரும் நம்பிக்கை

ஔ - 'ஔவை' என்ற மக்கள் பாவலர் இன்குலாப்

நாடகம். பல அதிர்வுகளை ஏற்படுத்தியது என்னுள்

ஃ - ஆயுதமும் செய்வோம்

(நன்றி : ஹேமா , சி.கருணாகரசு )

14.09.2009 ‘உயிரோசை' இணைய இதழில் எனது கவிதை:

2009-09-15T22:10:00.000-07:00

(நன்றி : உயிரோசை)

நீர் சுழி
திசை திருப்பினேன்
எனக்கான அமர்வை
திரைச் சீலை மாற்றினேன்
தரை விரிப்பு புதிதானது
அழைப்பு மணியில் குயில் கூவியது
உள்பேசி தொலைபேசி அலைபேசி
வர்ணம் வடிவம் மாறியது
வலத்தில் சிரிக்கும் புத்தர்
இடத்தில் வலக்கை பிள்ளையார்
நேர் எதிர் காசுக் கடவுள்
மேசை கண்ணாடியினுள்
இஷ்ட தெய்வங்கள் இன்னும்பிற
இடமும் வேலையும்
சேர்ந்தே மாற்றினேன் ஊழியர்களுக்கும்
எல்லாம் சரியானது என்றமர்ந்தேன்...

முன்பும் பின்பும்
இன்னொருவருக்காக
காத்திருந்தது
மெளனமாய் இருக்கை

2009-09-11T22:49:00.000-07:00

மலை குன்று மணல் மேடு
பனை தென்னை வாழை மரம்
விளைந்த நிலம் வறண்ட நிலம்
கை அசைத்த கை கொட்டிய குழந்தை
மெலிந்த ஆறு தளர்ந்த நதி
குடிசை ஓட்டு மச்சு வீடு
நின்றவர்களை உள்ளிழுத்தும்
உள்ளவர்களை வெளியே நிறுத்தியும்
செல்கிறது ரயில் வண்டி.

2009-09-08T06:11:00.000-07:00

புத்தகம்

இரண்டு கரை
மேல் கீழ் என்று.
நடுவில் நீராடும்
கடலில் நாம்.
மூழ்கி மூழ்கி
எடுப்பது
நம்மை தான்
*****************
புத்தக நிலையம்
வெளியேறும் போதெல்லாம்
ஏதோ தவற விட்ட நினைவு

(திரு.பொன்.வாசுதேவன் 'அகநாழிகை' வெற்றி பெற வாழ்த்துகள்)

பெயரிடப்படாத ஒரு தெருவாசி

2009-08-30T23:07:00.000-07:00

வாழ்க்கை புத்தகத்திலிருந்து பிய்த்து எடுத்தது போல, நட்ட

நடுவில் இரண்டு பக்கங்களை மட்டும் காட்டும். முன்கதைச்

சுருக்கங்களும், பின்கதைச் சுருக்கங்களும் வாசிக்க கிடைப்பதே

இல்லை, கடைசி வரை.

'அகம்-புறம்' - வண்ணதாசன்

(முகவரி)

எந்த தேசத்தின் அடையாளமும் இல்லை

எல்லா இனத்தின் மிச்சமாகவும் தெரிந்தான்

(பார்வை)

ஓரிடத்திலேயே நிலை கொண்டியிருக்கும்

ஓரிடம் நில்லாமல் அலையும்

திடுக்கிட்ட நொடியில் தெருவே குலுங்கி
நிற்பது போல் தோன்றும்

(மொழி)

புகைந்த சிகரெட்டை 'தா' என்ற இருவிரல்

                     சிற்றுண்டி விடுதியில் வயிற்றை தட்டி 'பசி' என்ற
                     புறங்கை
                     தேநீர்க்கடையில் 'டீ' என்று உயர்த்திய
                     கட்டைவிரலை யாரும் மறுத்ததில்லை

ஆரம்பத்தில் வேற்று மனிதனாகவும்

பின்பு பழகிய ஒன்றாகவும்

முன்பே
கடந்தவனாக தெரிந்தான்

ஒரு நாளில் ..

நாளிதழை படித்தவன்

கால் சட்டை பையிலிருந்து

கசங்கிய காகிதத்தை எடுத்து

முன் பின் பார்த்தான்

இரண்டையும் கிழித்தெறிந்தான்

அன்றிலிருந்து

ஒரு கவளமோ மிடறோ

உள்செல்லவில்லை

திணித்த

காசு முதலானவைகளை

வீசிஎறிந்த உறுதி

மூத்திரசந்தில்

ஒருக்களித்து கிடந்த

போதும் குலையவில்லை

நிலைகுத்திய
கண்களில்.

திரும்புதல்

2009-08-26T03:13:00.000-07:00

அண்ணன் அறிவுமதி பக்கங்களில்

பகிர்ந்து கொண்டிருந்தார் நமக்கான

வலியை*

சான்று சொன்ன புகைப்படத்தை

கேள்வி கேட்டு கொண்டிருந்தாள்

மடியில் அமர்ந்த என்சிறுமி

பத்து பனிரண்டு படத்தில்

இயன்ற அளவு கைகளிலும்

கொள்ளாத அளவு மனதிலும்

கனங்களை கொண்டிருந்தார்கள்

"இவங்கள யாருப்பா ''

'நம்ம சொந்தகாரங்க '

"இவ்வளவு பேர் எங்கேயிருந்து வராங்க"

'அவங்க ஊர்லயிருந்து '

"திரும்பி எப்ப போவாங்க "

'......'

(*வலி - இலட்சியக்கவி அறிவுமதி - தமிழ் மண் வெளியிடு )

உறங்காத பெரு வெளி

2009-08-20T22:29:00.000-07:00

கதைகளின்

ஆரம்ப வரிகளில்

உறங்கிபோகிறாள்

சின்ன பாப்பா

இடை இடையே

கேள்விகளால்

ஆக்கப்பட்டிருந்தான்

பெரியண்ணன்

விடு கதைகளின்

விடைகளை

தேடி அலைகிறான்

உதய குமாரன்

பெருங்காடுகளில் .,

அலைந்து திரிந்த

குளம்பொலி

புலம்புகிறது

அங்கும் இங்கும்

கதை சொல்லி

பின்னொரு நாளில்

உறங்க கூடும்

என்று உறங்கும்
கதைகளும் விடுகதைகளும்

உயிரோசை 28.09.2009 இணைய இதழ் வெளியானது

நன்றி : உயிரோசை

என் கடிதம்

2009-08-18T22:00:00.000-07:00

உன்
தெரு மூலை குப்பை தொட்டியில்
கிழித்தெறியப்படும் வரை
** ** ** **
கடிதத்தில் குறிப்பிட்ட
நாள் நேரத்தில்
தான்
வந்திருந்தேன்.
காத்திருந்தோம்
உனது வீட்டு
வரவேற்பு அறையில்
நானும்
வாங்கி வந்த
ஆப்பிள்
யாழினிக்கு கிரீம் பிஸ்கட்
கொஞ்சம் பூக்கள்
மேசையின் மேல்
இன்னமும்
பிரிக்கப்படாத
என் கடிதமும்.
நடையோசை
அறிந்து
கடிதத்தை
மறைத்து கொண்டேன்
உன்
மறுத்தலின்
பாவனையை
நான் அறிவேன்
என் கடிதமோ
பாவனையின்
அவசியம்
புரியாமல் இருந்தது.
உன்
தெரு மூலை குப்பை தொட்டியில்
கிழித்தெறியப்படும் வரை ..

ஒற்றை பூ

2009-08-09T23:47:00.000-07:00

இன்றுதான் பூத்திருந்தது

ஊதா நிறத்தில் ஐந்து இதழ்கள்

அருகில் சென்றேன் பறிப்பதற்கு

வெளிர் நிற உள்நாக்கில்

சிறுவண்டு இரண்டு

ஒன்றின் மேல் ஒன்றாக

கண்டேன்

நேற்றிரவு தொட்டபோது

திரும்பிபடுத்த நினைவு

உற்று

கவனித்து பின்

தொடாமல்

திரும்பினேன்

நாள் ஒன்று..

2009-07-28T23:21:00.000-07:00

நிமிடமாவது
நின்று விடுகிறது
கால்களும் மனமும்
கடந்து செல்லும்
சவ ஊர்வலம்

உள்ளொளி

2009-07-28T22:57:00.000-07:00

அவனக்கு என்னவாயிற்று

இவன்:

குரல் கேட்குதாம் உள்ளுக்குள்

எவனக்கு கேட்கவில்லை

கேட்கவில்லை எவனும்

நின்று நிதானித்தால்

குரல் கேட்கவில்லை

பேசும் அல்லது சொல்லும்

என்றென புரியும்.

கேட்பதெல்லாம்

இவனும் அவனும் தான்.

அசைந்தாடும் தன்முனைப்பு

2009-07-28T22:06:00.000-07:00

என் வீட்டின் மரமொன்று

காற்றின் இசைவால்

பக்கத்து வீட்டில்

விதை தூவியது

பொழுதொன்றில்

துளிர்த்து

படர்ந்து

வளர்ந்தது.

முன்னோர்களின் வரிசையில்

என் மரம்.

'என்னிடமிருந்து பெற்றாய்'

ஏளனமாக பார்த்தேன்

இரு மரங்களும்

எண்ணிக்கொண்டன

'நாம்' என்று.

'ஹலோ'

2009-07-28T21:46:00.000-07:00

தன் துணையை

அல்லது

தன்னை போல் ஒன்றை

தேடித் களைத்து

மின் கம்பியில் அமர்ந்தது

குருவி

தீடிரென

எழுந்த

தன் குரலின்

Ring-tone - ஐ

கேட்டு

அதிர்ந்து

மடிந்து

விழுந்தது

கடைசி குருவி

எங்கள் ஊர் வரைப்படம் (கோடுகளால்அல்ல நிகழ்வுகளை கொண்டு.....)

2009-07-25T05:10:00.000-07:00

மேலத்தெருவுல வித்துட்டு
கீழத்தெருவுக்கு வந்தான்
பஞ்சுமிட்டாய்க்காரன்
ஒண்ணா தான் இருக்கு
சிரிப்பும் இனிப்பும்
--------------------------------
குலுங்கி குதிச்சு
வந்துபோச்சு
மினி பஸ்ஸு
--------------------------------
ரம்மும் கையுமா
நல்லாத்தான் இருக்காரு
சுருட்டு தாத்தா
---------------------------------
இந்த வருட திருவிழாவிற்கும்
ஓடவில்லை
ஆத்து தண்ணி
------------------------------------
வீடு வீடாய் பிடித்தாட்டியது
வண்ணத்தொலைக்காட்சி
---------------------------------
சாமியாடி தாத்தா
சைவத்துக்கு மாறியாச்சு
---------------------------------
ஏச்சு மட்டும் குறையல
---------------------------------
கதைச்சொல்லி
அரிதானது
பக்கத்தூர்
பெரியப்பா சாவு
SMS - ல் வந்தது
-----------------------
ஊருக்குபோய் வந்த போது
சைக்கிள் கடை மாமா கேட்டார்
'சாதி சனமெல்லாம் எப்படியிருக்கு?'
நினைத்துகொண்டேன்
சாதி இருக்கும் வரை.....
சனம் எப்படி?
-----------------------------------
நிகழ்வுகள் தொடரும்........

தூரிகை இறகு

2009-07-22T05:37:00.000-07:00

வன்தனிமையில்

சிறு சப்தங்களிலும்

சுருங்கிவிடுகிறது

என் புலம் அனைத்தும்

முகவரியை தொலைத்துவிட்ட

தவிப்பு

நொடியின் நகர்வு

கால சர்ப்பமாகிவிடுகிறது

பிரபஞ்சத்தின் விளிம்பு

என் பாகங்களின் பிடிமானமற்று

தளும்புகிறது

வீசியெறிந்த உமிழ்நீர்

துளியொன்று

இவ்வளவு துர்நாற்றத்தை பரப்பியது

துண்டிக்கப்பட்ட வால்

துடித்துக்கொண்டேயிருந்தது

கையடக்கமாய்

அமர்ந்தது

பறவையின் இறகு

(உயிரோசை 07.09.2009 இதழில் வெளியானது நன்றி: உயிரோசை )

நான் நானாகவே......

2009-07-22T00:58:00.000-07:00

உங்களிடம் சொல்வதற்கு காரணம் உண்டு
உங்களிடம் சொன்ன பிறகாவது
இவ்வண்ணம் நிகழாமல் இருந்தால்
மகிழ்ச்சி தான்.

கனவுகளில்
என்னையே நான்
பார்த்துக்கொள்கிறேன்.

கடலில் மிதக்கும் என்னை
நெருப்பில் வேகும் என்னை
பாறையில் சிதறும் என்னை
சேலைதலைப்பில் முகம் புதைக்கும் என்னை
துரத்தும் பாம்பிலிருந்து மேலெழும்பி பறக்கும் என்னை
தலை சிதறி துடிக்கும் என்னை

'தள்ளி நின்று பார்ப்பது பிராப்தம்'
என்கிறான் நண்பன்

நானோ
மிதவையாக வெந்த உடலாக
தெறித்த பிண்டமாக தாயின் இளஞ்சூடாக
காற்றில் இறகாக
பீறிட்டு எழும் வலியாகவே
உணர விரும்புகிறேன்

வாழ்வு என்பது வாழ்தல் தானே
கனவிலும்.

உங்களிடம் சொன்ன பிறகாவது ......

மரண கிணறு

2009-07-19T09:30:00.000-07:00

...குழந்தைகளின்
கண்கள் கட்டப்பட்டன
கட்டியவர்களின் வாயும் அடைக்கப்பட்டது
அடைக்கப்பட்டவர்களின் கைகளும் பிணைக்கப்பட்டன
பிணைக்கப்பட்டவர்களின் கால்களும் இறுக்கப்பட்டன
இறுக்கப்பட்டவர்களின் பால் உறுப்புகளும் சிதைக்கப்பட்டன
சிதைக்கப்பட்டவர்களின் தலைகளும் கொய்யப்பட்டன
கொய்யப்பட்டவர்களின் வீடுகளிலிருந்த
குழந்தைகளின்
கண்களும் கட்டப்பட்டன..........

சேதி கேட்டேன்

2009-07-13T23:39:00.000-07:00

நடையாய் நடந்து

அரசாங்க ஆசுபத்திரியில்

பிள்ளை பெற்றாள் தாயொருத்தி

முழுவதும் குளிரூட்டப்பட்ட

உயர்ரக Hospital -லில்

இன்னொரு தாயும்.

பிள்ளை பெரிதானார்கள்

பெருமாள் அனுமான்

என்ற பேறு பெற்றார்கள்.

பரண்

2009-07-02T22:16:00.000-07:00

கரையான்கள் அரித்த
பழுப்பேறிய சட்டத்திலிருந்து
சில்லு சில்லாய் சிதறின
பார்வையின் மிச்சங்கள்
உள்ளங்கையில் அழுத்தி
குவிக்க அமிழ்ந்தவை
சுருக்கென்றது
இளஞ்சுடாய்
ஒரு சொட்டு
உன் முகம்

தூக்கு

2009-06-19T03:57:00.000-07:00

வீசியெறிந்த

ரொட்டித்துண்டாய்

மெளனம்
பூஞ்சையுற்றிருக்கும்

உடைந்த கண்ணாடி

துண்டுகள் ரீங்காரமிட்டு

முறமான காதுக்குள்

கூடு கட்டும்

ஆயிரமாயிரம்

புரவியின் குளம்புகள்

வேற்றிடம் மாறாது

ஒரிடத்திலியே

சப்தங்களை

அரைகுறையாய்

கடித்து துப்பும்

நீள மீட்சியின்

வெளிச்ச புள்ளிக்குள்

சீழ்பிடித்தவற்றை

கணல் வைத்து

பொசுக்கும்

ஒரு பிடி

காற்றை பிடிக்க

முயன்று

துவண்டு விழும்

தெறிக்கும்

விரல்கள்

வெற்று

கழிவுகளை

பிடுங்கியெறிந்து

புழுவெனக் கோணிக்

கொள்ளும் நாக்கு

முன்பு

பெய்த

பெருமழையை

எண்ணி திரும்ப

மனமில்லாமல்

மேல்குத்தும்

விழிகள்

மீறு

2009-06-13T00:42:00.000-07:00

வளையலனி
பொட்டிடு

பூச்சூடிக்கொள்
சேலை மட்டுமே
உடுத்து
உதட்டில் சிரி
உள்ளுக்குள் அழு
ஆடவர் என்றால் தலைகுனி
பெண் என்றால் வாயைமூடு
கவிதையாவது கதையாவது
கோலங்கள்
சமையல் தவிர
வேறு பக்கங்கள்
பார்க்காதே
பிடித்தவற்றை மறந்து போ
ஆம், நம்பு
இன்றிலிருந்து நீ
'மனைவி' யாக சமைக்க பெற்றாய் .

பெட்டகம்

2009-05-29T06:28:00.000-07:00

நினைவடுக்குகளில்
ஒரு பெட்டகம் செய்தேன்
முத்தங்களை சேமிப்பதற்கு.
சிறுதுளி ஈரமாகட்டும்
பெருங்காமத்தின்
பின்மிச்ச நுரையாகட்டும்
அவ்வப்போதே அனைத்தும்
பத்திரப்படுத்திக் கொண்டேன்.

அவசர கதியின்
இதழ் உரசலாகட்டும்
ஆழமான உயிர்
உறிஞ்சலாகட்டும்
சிதறாமல்
அணைக்கட்டினேன்.
விடியலின் இறுக்கத்தையும்
மாலையின் தழுவலையும்
உறையச்செய்தேன்.

வீண் வேலையென்றே
பரிகாசித்தன உன் அடுத்த
முத்தத்தின்
இதழோரக் குவிப்பு.

22.03.2010 உயிரோசை இணைய இதழ்

நன்றி : உயிரோசை

* * *

மரணம்

2009-05-29T03:40:00.000-07:00

அத்துவான காட்டிலோ

ஆள் அரவமற்ற சாலையிலோ

நிகழ்ந்து விடுமோ?

வேக வேகமாய்

குறிப்பெடுத்து கொண்டிருக்கிறேன்

அச்சத்தின் சாயலையும்

வெளியேறுவதற்க்கான

விளக்கங்களையும் கேட்டு

வேல் கண்ணன்

நண்பர்களும் வருக

நிதர்சன ஒளி

மிச்ச உயிர்

அமிழ மறுக்கும் பந்துகள்

ஆதியும் அந்தமும்

மே வானவில்

வேள்வி

நினைவோட்டம்

பிறிதொரு நாளில்

தற்காலிமாக

இன்னும் செல்ல வேண்டும்

ஒரு வரி கூட எழுதவில்லை

புரிதல் வியத்தல் வீழ்தல்

பாதரசம்

எனது போர்க்களம்

உன்னிடம் சொல்லிவிட வேண்டும்

தினசரி

நிழற்படம்

டிசம்பர் மாத கேணி சந்திப்பில் வண்ணதாசன்

காட்டில் நிர்வாணமில்லை

நாளையும்

இறுதி வாக்குமூலம்

மனிதனின் பிரமாண்டம் - ஒரு எதிர்க் குரல்

காலச்சுவடுகள் *

பெருநகர சாலையில்

ஒரு விண்ணப்பம்

இறுதி செய்தி

பேரழிவும் பேரண்டமும்

காணவில்லை : நீயும் நானும்

நாம் மழைக்காக காத்திருக்கிறோம்

நிர்வாணத்தை கவனித்தல்

மன வட்டம்

ஆறுதல்

விடியல்

வெண் சிலுவை

தூய்மையை நேசித்தவன் உங்களுக்கு உதவும் என்று நம்புகிறேன்

இது ஷகினாவின் வலி. இதில் மறுக்கமுடியாத உண்மை இந்த வலி நாம் கண்முன்னே நடந்து கொண்டே தான் இருக்கிறது இன்னமும்.

வெண் சிலுவை என்பது ஒரு குறியீடு மட்டுமே : இதன் பொருளாக

தூய ஒளி அல்லது அடர் இருள்,

விடுதலை அல்லது வெறுமை ,

மனதெளிவு அல்லது மனபித்து இதில் நீங்கள் எதையும் தேர்வு செய்து கொள்ளலாம் - கதையை படித்த பின்பு.

'திற'(open it)

கருத்து சொன்ன(கேட்ட) அனைத்து நண்பர்களுக்கும் மிகுந்த நன்றியும் அன்பும்

கனவின் மிச்சம்

சுய தேடல்

தீராத இசை மீட்டலில்

வெளியேற்றம்

விடியாமல் போகட்டும்

கதை

கொடூர விலங்கொன்றின் சாயை

துளியின் வலி

ஆத்மா நாம் நினைவாக ..

காகித கப்பல்

சப்த ஓசை

சரிகை வண்ணத்துப்பூச்சி

அவரைப் பற்றி

புலப்படா வெளிச்சம்

காவேரி அக்கா

மச்ச பலன்

அனனவருக்கும் பொங்கல் வாழ்த்துகள்

இவையனைத்தும்...

பார்வையாளன்

எதிர் வினை

மரங்களடர்ந்த சாலையின் காலை

மெளன புரிதல்

நிறுத்தம்

சுவாசம்

நண்பர் கிருஷ்ண பிரபு அழைப்பு : தொடர் பதிவு

ஒப்பம்

கிண்ணத்தில்..

என் காதல் கவிதையும் நீயும்..

சேதி

அறையில்.....

முள்வேலிகளுக்கு அப்பால்

பிரதான சாலையின் இரு நிகழ்வுகளும் பெருமழையும்

பறத்தல்

இருந்து விட்டு போகட்டும்

வேல் கண்ணன் கவிதைகள்

தோழர் சி.கருணாகரசு மற்றும் தோழி ஹேமா அவர்களின் அன்பான அழைப்பிற்கு....

மனதெளிவு அல்லது மனபித்து

இதில் நீங்கள் எதையும் தேர்வு செய்து கொள்ளலாம் - கதையை படித்த பின்பு.