நிர்வாணத்தை கவனித்தல்

சன்னலற்ற உள்தாழிடப்பட்ட அறையின்
கண்ணாடி முன் நிர்வாணமாய் நின்றிருந்தேன்.
உற்று கவனிக்கும் யாரோ
அருவெறுப்பான அழுகும்
என் நிர்வாணத்தைப்பற்றி பேசவும் கூடும்
அவர்களின் நிர்வாணத்தை மறைத்தபடி.
கேட்பவர்கள் தன் நிர்வாணத்தை
விடவும் பெரிதாக்கி கொள்ளலாம்
அவரவர்களின் அறையினுள் நுழையும் வரை.
கவனிக்க:
அவ்வறையை உற்று நோக்குபவனாகவும் நானிருக்கலாம்


நன்றி : தடாகம்

மன வட்டம்

முதலுக்கும் முடிவிற்கும்
ஊசலாடிக்கொண்டியிருக்கும் 
சிதறிய எண்ணத்தின்
தவிப்புகளைக் ஆதாரமின்றி
சுழலவிடும் வட்டப்பந்து

உனது எனது என
பிரித்தறிய முடியாதவைகளை
யாராலும்
அடையாளம் காணமுடியவில்லை
விடுபடுதலின் விதிகளை
மனனம்
செய்தும் பலனில்லை
 

வனத்தின் ஏதேனும் ஒரு
முனையிலிருந்து ஊற்றெடுக்கும்
நீருற்று என்னை நோக்கி
          ....வரும்
          ...வருகிறது
எனவும் நினைத்துகொள்ளும் மனம்

நன்றி :  உயிர் எழுத்து  ஜூலை 2010, தடாகம்