நிதர்சன ஒளி

 

 

உன் வாசல் நெளிக்
கோலங்களிலிருந்து வண்ணங்களாக
பட்டாம்பூச்சிகள்  பறக்கின்றன
அவற்றிலிருந்து மீறியெழும் வாசனையொன்று
மகரந்தங்களை மலரவைக்கிறது 

உன் கைகளில் உருளும் 
தாயக்கட்டைகளிலிருந்து  தொடர்ச்சியாக
தாயங்கள் விழுகின்றன
தாயங்களிலிருந்து  மீறியெழும் புள்ளியொன்று
ஒளிச்சுழலை உறையவைக்கிறது 

உன் கேசத்திலிருந்து உதிரும்
இழையொன்று இரவுகளாகக்
கவிழ்கின்றன
இரவுகளிலிருந்து மீறியெழும் கனவொன்று
நினைவுகளை நிலைக்க வைக்கிறது 

உன் தூரிகையிலிருந்து வடியும்  

ரகசியமொன்று கதைகளாக
உலவுகின்றன
கதைகளிலிருந்து மீறியெழும் 

சொல்லொன்று 

புதிரொன்றை விடுவிக்க  வைக்கிறது

 

நன்றி : கல்கி  

(22. 1. 2012 கல்கி இதழில் வெளியானது)

நன்றி : ஓவியர் A.Selvam