உருண்டோடும் மூன்றாம் உலகம்




மடியில் கிடந்த இரண்டு பந்துகளைவிடச்
சின்னஞ்சிறிய சிவப்பு நிறப்பந்து
உன் இடது பிஞ்சுக் கையில் கச்சிதமாய்ப் பொதிந்திருந்தது
'கேட்ச்' என்று என்னை நோக்கி வந்ததைத் தவறவிடுகின்றேன்
கரைபுரண்டு ஓடும் நதியின் குளிர்ந்த கூழங்கற்கள் வந்தடைகின்றன
அடுத்ததாக மூவண்ண பந்தை
வலதுப் பிஞ்சிலிருந்து எறிய, தவறவிடுகின்றேன்
மிதக்கும் நந்தவனத்தில் பதினோரு துளையிட்ட
புல்லாங்குழலை மாயா வாசிக்க கேட்கிறேன்
இறுதியாக உன் இருகைகளிலும் பிடித்தெறிந்த
பலவண்ணமுள்ள பந்தைச் சரியாகப் பிடித்த நொடியில்
கிடுகிடு பள்ளத்தாக்கில் இவ்வுலகை இழுத்துச் செல்கிறது
பெரும்பாதரசக் குண்டு

(சோலைமாயவனின் மாயாவிற்கு )

நன்றி : தி இந்து தமிழ் தீபாவளி மலர் 2019
நன்றி : Jaikumar Mankuthirai , தி இந்து குழுமம்

No comments: